खून, दरोड्यातील सात गुंड सातारा, सांगली, रत्नागिरीतून तडीपार; पोलिस अधीक्षक बन्सलांची धडाकेबाज कारवाई

सातारा : उंब्रज परिसरात खून, गर्दी- मारामारी, खुनाचा प्रयत्न, गंभीर दुखापत अशा अनेक गुन्ह्यांमध्ये सहभागी असलेल्या दोन टोळ्यांतील सात गुंडांना पोलिस अधीक्षक अजय कुमार बन्सल यांनी सातारा, सांगली व रत्नागिरी जिल्ह्यांतील काही तालुक्‍यांतून एक वर्षासाठी तडीपार केले आहे. 

विशाल अशोक दुटाळ (वय 24), किरण आनंदराव पवार (वय 28), अविनाश राजेंद्र पवार (वय 20) व आषुतोश गणेश संकपाळ (वय 20) (सर्व रा. आंधारवाडी, ता. कऱ्हाड) यांची एक टोळी आहे. गंभीर दुखापत, गर्दी- मारामारी, खुनाचा प्रयत्न अशा गुन्ह्यांमध्ये या टोळीतील सदस्य गुंतले होते. त्यांना सातारा जिल्हा, तसेच सांगलीतील कडेगाव, वाळवा, शिराळा व रत्नागिरी जिल्ह्यातील चिपळूण तालुक्‍यांतून एक वर्षासाठी तडीपार करण्यात आले आहे. 

मंत्री शिंदेंनी सोडविला सातारकरांची तहान भागवणाऱ्या कासचा प्रश्न; खासदार उदयनराजेंच्या प्रयत्नांना यश

दुसरी टोळी पवन ऊर्फ प्रवीण शामराव साळुंखे (वय 34, रा. कवठे, ता. सातारा), राजेंद्र ऊर्फ भिकोबा मारुती मसुगडे (वय 35, रा. नवीन कवठे, ता. कऱ्हाड), कैलास तात्याबा चव्हाण (वय 30, रा. कोपर्डे हवेली, ता. कऱ्हाड) यांची आहे. त्यांच्यावर खून, खुनाचा प्रयत्न, गर्दी- मारामारी, आदेशांचा भंग करणे अशा प्रकारचे गुन्ह्यांत सहभाग होता. या सर्वांना सातारा जिल्हा, तसेच सांगलीतील कडेगाव, वाळवा व शिराळा तालुक्‍यांतून एक वर्षासाठी तडीपार करण्याचे आदेश काढण्यात आले आहेत.

बॉंबच्या साहाय्याने रानडुकराची शिकार; कोल्हापुरातील तिघांसह पाच जणांवर पाटणात गुन्हा

या दोन्ही टोळ्यांतील गुडांवर वारंवार प्रतिबंधात्मक कारवाई करण्यात आली होती, तरीही त्यांच्या वर्तनात सुधारणा झाली नव्हती. त्यामुळे त्यांना तडीपार करण्याबाबत उंब्रज पोलिस ठाण्याचे सहायक निरीक्षक अजय गोरड यांनी पोलिस अधीक्षकांकडे प्रस्ताव पाठविला होता. या प्रस्तावाच्या सुनावणीदरम्यान अतिरिक्त पोलिस अधीक्षक धीरज पाटील यांच्या मार्गदर्शनाखाली स्थानिक गुन्हे अन्वेषण विभागाचे निरीक्षक किशोर धुमाळ, उंब्रज पोलिस ठाण्याचे सहायक निरीक्षक अजय गोरड, स्थानिक गुन्हे अन्वेषण विभागाचे सहायक फौजदार मधुकर गुरव यांनी पुरावा सादर केला. 

लॉकडाउनच्या भरपाईसाठी आमदार-खासदारांच्या निधीचाही सरकारने वापर करावा : पृथ्वीराज चव्हाण

'एसपीं'कडून आतापर्यंत 41 गुंड तडीपार
 
पदभार स्वीकारल्यापासून पोलिस अधीक्षक अजय कुमार बन्सल यांनी समाजात दशहत माजविणाऱ्यांना तडीपार करण्याची धडक मोहीम राबविली आहे. त्यानुसार आतापर्यंत दहा प्रस्तावांतील 41 जणांना त्यांनी तडीपार केले आहे. त्यामुळे गुन्हेगारांवर वचक बसण्यास मदत झाली आहे.

टोलचे भूत मानगुटीवरून उतरणार कधी?; उदयनराजेंसह महाविकास आघाडीतील नेत्यांची भूमिका ठरणार महत्त्वाची!

संपादन : बाळकृष्ण मधाळे