पठाण कुटुंबीयांनी 300 रुपयात खोदली विहीर; 18 फुटांवर लागलं पाणी

रहिमतपूर (जि. सातारा) : लॉकडाउनच्या (lockdown) काळात घरीच राहून मोकळ्या वेळेचा सदुपयोग करत येथील पठाण कुटुंबीयांनी 15 ते 16 दिवसांत 23 फूट खोल विहीर (well) खोदली. त्यासाठी त्यांना फक्त 300 रुपये खर्च आला. कोरोना काळात कामधंदे बंद असल्याने सर्वसामान्यांची मानसिकता ढासळत असताना पठाण कुटुंबीयांनी निवडलेला मार्ग त्यांना नक्कीच ऊर्जा देईल. (satara-positive-story-pathan-family-digged-well-rahimatpur)

कोरोना संकट सर्वत्र घोंगावत असताना बाधितांचा संख्या कमी करण्यासाठी शासनाकडून लॉकडाउन करण्यात आले आहे. हातावरचे पोट असल्याने पाहिल्यापासूनच कष्ट करण्याची सवय असलेले जावेद पठाण हे वाहन दुरुस्तीचे काम करतात, तर महिबूब पठाण हे दिवसभर कुल्फी विक्रीचा व्यवसाय, पहाटे व रात्री मिळेल ते काम करून कुटुंबाचा उदरनिर्वाह करतात. परंतु; लॉकडाउनमुळे पूर्ण व्यवसाय ठप्प असल्याने घरी बसून दिवस काढण्यापेक्षा मिळालेला वेळ ही संधी समजून पठाण कुटुंबीयांनी पाणीटंचाईचा प्रश्न दूर करण्यासाठी घरामागील जागेत विहीर खोदण्याचा निर्णय घेतला.

ईदच्या (Ramzan Eid) दुसऱ्या दिवशी ता. 15 मे रोजी सकाळी आठ वाजता जावेद, मेहबूब, शाफिक पठाण हे बंधू व फैजान पठाण यांनी विहीर खोदण्यास सुरवात केली. घरातील इतरही मंडळी जमेल त्या पद्धतीने मदत करतच होते. ही विहीर काढण्यासाठी त्यांनी फक्त घरगुती वस्तूंचा वापर केला. विहीर खोल गेल्यानंतर माती बाहेर काढण्यासाठी दुचाकीचा वापर करून माती बाहेर काढण्यात आली. या संपूर्ण विहिरीसाठी फक्त माती काढण्यासाठी दुचाकीला तीन लिटर पेट्रोल लागले आणि तोच खर्च पूर्ण विहीर काढण्यासाठी झाला असल्याचे पठाण कुटुंबिय सांगत आहेत.

घरापासून ओढा जवळ असल्याने 18 फुटांवर पाणी लागले. हे पाणी टिकून राहावे यासाठी त्यांनी आणखी 5 फूट विहीर खोल केली. जवळपास 23 फूट खोल व 7 फूट रुंद अशी विहीर पठाण कुटुंबीयांनी फक्त 15 ते 16 दिवसांत पूर्ण केली. या विहिरीमध्ये सध्या जवळपास चार फूट पाणी आहे. विहिरीतील थंडगार पाणी पाहून भर उन्हात केलेल्या कष्टचे फळ मिळालेच, पण आयुष्यभराचा पाण्याचा प्रश्नही मिटल्याचे समाधान त्यांनी व्यक्त केले.

काही सुखद बातम्या वाचा