व्वा! 98 वर्षांच्या आजोबांनी "त्याला' हरवलेच!

खंडाळा (जि. सातारा) : शिरवळ येथील हाजी महेबुबशा बाबुमिया काझी (वय 98) या आजोबांनी कोरोनावर मात करून कोरोना योद्धा म्हणून लौकिक मिळवला. कोरोनामुक्त झाल्यानंतर त्यांचे फुलांच्या वर्षावात स्वागत करण्यात आले. 

अनेक आजार असतानाही कोरोनाशी यशस्वी लढा दिल्याने कोरोनाला घाबारायचे नाही, असा आदर्श या आजोबांनी इतरांपुढे ठेवला आहे. शिरवळमध्ये लॉकडाउन असल्यामुळे शिरवळ न्यू कॉलनी येथील मेहबुशा काझी यांना अशक्तपणा आल्यामुळे 15 जुलै रोजी शिरवळ येथील खासगी रुग्णालयात दाखल करण्यात आले. तेथे प्रथम त्यांची कोरोना चाचणी घेण्यात आली. त्यामध्ये श्री. काझी पॉझिटिव्ह आले. त्यानंतर आरोग्य विभागाने 17 जुलै रोजी त्यांना उपचारासाठी सातारा येथे दाखल केले. त्या वेळी त्यांचे नातू इम्रान काझी यांनी डॉक्‍टरांना विनंती करून आजोबांची या वयात देखभाल कशी होणार? म्हणून आजोबांसोबत येण्याचा आग्रह धरला. सातारा येथे उपचार सुरू असताना मधुमेहाचा त्रास असतानाही सात दिवस इम्रान यांनी आजोबांची सुश्रषासह सर्व सेवा केली. त्यानंतर शिरवळ येथील विलगीकरण कक्षात चार दिवस ठेऊन या आजोबा व नातवाला घरी सोडण्यात आले. त्यावेळी शिरवळमध्ये स्थानिकांनी फुलांचा वर्षाव करत या आजोबांचे कौतुक केले. डॉक्‍टरांनी योग्य उपचार केल्याने आजोबा काझी कोरोनातून बरे झाले. 

(संपादन ः संजय साळुंखे) 

शाळा बंद; शिक्षकांच्या बदल्यांचा अट्टाहास का?