राष्ट्रवादीच्या प्रदेश सरचिटणीसपदी समिंद्रा जाधव; खासदार सुळेंकडून उत्कृष्ट कामाची दखल

सातारा : राष्ट्रवादी कॉंग्रेसच्या महिला जिल्हाध्यक्षपदाचा कार्यकाल संपल्याने समिंद्रा जाधव यांची राष्ट्रवादीच्या प्रदेश सरचिटणीसपदी नियुक्ती करण्यात आली आहे. गेल्या पाच वर्षांत महिला जिल्हाध्यक्षा म्हणून केलेल्या उत्कृष्ट कामाची दखल घेऊन खासदार सुप्रिया सुळे यांनी त्यांचीही निवड केली आहे.

राष्ट्रवादी कॉंग्रेसच्या राज्याच्या महिला आघाडीच्या पदाधिकाऱ्यांच्या निवडी नुकत्याच करण्यात आल्या. त्यामध्ये सौ. जाधव यांना प्रदेशाध्यक्षा रूपालीताई चाकणकर यांच्या हस्ते नियुक्तिपत्र देण्यात आले. ग्रामपंचायत सदस्य म्हणून राजकारणात प्रवेश केलेल्या जाधव यांनी राष्ट्रवादी कॉंग्रेस पक्षासाठी दिलेला वेळ, पक्ष संघटन मजबुतीसाठी केलेले कार्य लक्षात घेऊनच त्यांची राष्ट्रवादी कॉंग्रेसच्या प्रदेश सरचिटणीस पदावर वर्णी लागली आहे. राष्ट्रवादी कॉंग्रेसच्या महिला जिल्हाध्यक्षा म्हणून जाधव यांच्याकडे पक्षाचे अध्यक्ष खासदार शरद पवार, खासदार सुप्रिया सुळे, उपमुख्यमंत्री अजित पवार यांच्यासह मान्यवरांनी जबाबदारी सोपवली होती.

म्हारी छोरियां छोरों से कम हैं के?; ऑलिंपिकसाठी अंशु मलिकची कझाकिस्तानात 'दंगल'

जिल्हाध्यक्षपदाच्या पाच वर्षांच्या कार्यकाळात त्यांनी पक्ष तळागाळातील महिलांपर्यंत पोचविण्याचे काम केले. महिलांच्या अडचणी सोडवण्यासाठी प्राधान्याने पुढाकार घेऊन त्यांना मूळ प्रवाहात आणण्याचे काम त्यांनी केले. युती सरकारच्या विरोधात त्यांनी विविध विषयांवर आंदोलन करून आवाज उठवला होता. त्यांच्या या कामाची दखल घेऊन राष्ट्रवादी कॉंग्रेसच्या प्रदेश पातळीवर सरचिटणीस या पदावर नियुक्ती करण्यात आली आहे. प्रदेशाध्यक्षा रूपाली चाकणकर यांच्या हस्ते नियुक्तिपत्र देण्यात आले. या वेळी माजी खासदार आनंद परांजपे उपस्थित होते. या निवडीबद्दल त्यांचे खासदार सुप्रिया सुळे, विधान परिषद सभापती रामराजे नाईक निंबाळकर, खासदार श्रीनिवास पाटील, पालकमंत्री बाळासाहेब पाटील, आमदार शशिकांत शिंदे, मकरंद पाटील, राष्ट्रवादीचे जिल्हाध्यक्ष सुनील माने आदींनी अभिनंदन केले आहे.

Edited By : Balkrishna Madhale