Patan Crime News : मुलीवर अत्याचारप्रकरणी पाटणमधील एका गावात बंद

मोरगिरी - पाटण तालुक्यातील एका गावातील युवकाने अल्पवयीन मुलीला वेळोवेळी दमदाटी, शिवीगाळ करत लैंगिक अत्याचार केल्याचा प्रकार घडला आहे. या घटनेचा निषेध करीत एका गावात आज आठवडा बाजारासह दुकाने बंद ठेवून कडकडीत बंद पाळून निषेध नोंदवला. या बंदला नागरिकांनी उत्‍स्फूर्त प्रतिसाद दिला असून बंद काळात कोणताही अनुचित प्रकार घडू नये याकरिता पाटण पोलिसांनी चोख बंदोबस्त ठेवला होता.

एका अल्पवयीन मुलीचा लैंगिक अत्याचार केल्याची घटना नुकतीच उघडकीस आली आहे. यासंदर्भात संशयित युवक हा अल्पवयीन मुलीला दमदाटी, मारहाण करीत असल्याचा व्हिडिओ सोशल मीडियात व्हायरल झाला होता.

त्यानंतर संशयित युवकावर पाटण पोलिसात गुन्हा दाखल झाला असून, त्यास अटक करण्यात आली आहे. या घटनेचा निषेध करण्यासाठी आणि संबंधित संशयितास कठोर शिक्षा व्हावी, यासाठी तालुक्यातील एका गावात बंद ठेवण्यात आला. खासगी वाहतूकही बंद ठेवली होती. ग्रामस्थ, व्यापाऱ्यांनी कडकडीत बंद पाळून या घटनेचा निषेध नोंदवला. बंद काळात कोणताही अनुचित प्रकार घडू नये, याकरिता पाटण पोलिसांनी चोख बंदोबस्त ठेवला होता.

संबंधित संशयिताचे वकीलपत्र कोणीही घेऊ नये, अशी मागणी स्थानिकांच्या माध्यमातून वकील संघटनेकडे निवेदनाद्वारे केली आहे. अल्पवयीन मुलीशी अश्लील व निंदनीय कृत्य करणाऱ्या युवकावर कठोर शासन होण्याबाबतचे निवेदन प्रांताधिकारी, पोलिस उपअधीक्षक व पाटण पोलिस ठाण्याचे पोलिस निरीक्षक यांना देण्यात आले आहे.