आपत्तीत अधिकाऱ्यांनी सतर्क राहावे : शंभूराज देसाई

मोरगिरी : पाटण विधानसभा मतदारसंघातील जनतेला प्रतिवर्षी अतिवृष्टीच्या काळात आपत्तीचा सामना करावा लागतो. आपत्तीच्या काळात तालुका प्रशासनाने कोणताही हलगर्जीपणा न करता सतर्क राहावे, अशा सूचना माजी गृहराज्यमंत्री आमदार शंभूराज देसाई यांनी तालुका प्रशासनाला दिल्या.

दौलतनगर येथे आमदार देसाई यांच्या अध्यक्षतेखाली आपत्ती व्यवस्थापन व प्राथमिक नियोजनासंदर्भात तालुका प्रशासनाची बैठक झाली. त्यामध्ये ते बोलत होते. आमदार देसाईंनी नदीकाठच्या गावांना या काळात सतर्क राहावे. वैद्यकीय अधिकारी यांनी मॉन्सून काळात साथीचे रोग पसरणार नाहीत, याच्या उपाययोजना कराव्यात, पावसाळ्यात ग्रामीण, डोंगरी भागात साथीच्या रोगाबरोबर सर्पदंशाचे प्रमाण वाढते. त्यामुळे प्राथमिक आरोग्य केंद्र, उपकेंद्र, ग्रामीण रुग्णालयात औषधसाठा आताच उपलब्ध करावा. वैद्यकीय अधिकाऱ्यांना २४ तास अलर्ट राहावे. आपत्ती काळात रुग्णवाहिकेची व्यवस्था तत्काळ करावी. वीजपुरवठा सुरळीत राहण्यासाठीही प्रयत्न करावे. प्राथमिक शाळेतील विद्यार्थ्यांची गैरसोय होणार नाही, याची काळजी घ्यावी.