'102 मतांवरून तीन लाख मतांचा अंदाज बांधणं हास्यास्पद : शंभूराज देसाई

ढेबेवाडी (सातारा) : जिल्हा बँकेच्या (Satara District Bank Election) १०२ मतांवरून तालुक्यातील तीन लाख मतांचा अंदाज बांधणे हास्यास्पद असून दूर कशाला, आगामी जिल्हा परिषद (Zilla Parishad Election) व पंचायत निवडणुकीतच विरोधकांना ट्रेलर दाखवू, असा टोला गृहराज्यमंत्री शंभूराज देसाई (Shambhuraj Desai) यांनी लगावला.

निसरे-मारुल हवेली-गुढे-काळगाव रस्त्याच्या सुधारणा कामाचे भूमिपूजन मंत्री देसाई यांच्या हस्ते झाले. त्याप्रसंगी कुठरे येथील सभेत ते बोलत होते. मोरणा शिक्षण संस्थेचे अध्यक्ष रविराज देसाई, डॉ. दिलीपराव चव्हाण, पंचायत समिती सदस्य पंजाबराव देसाई, बबनराव पाटील, बांधकाम व्यावसायिक महेश पाटील, शिवसेना उपतालुकाप्रमुख सागर नलवडे उपस्थित होते. देसाई म्हणाले, ‘‘सर्वसामान्यांच्या विकासाशी असलेली माझी बांधिलकी आणि जोडलेली नाळ मी कधीही तुटून देणार नाही. पाटण तालुका हा पश्चिम महाराष्ट्रातील विकासाचे रोलमॉडेल बनवायचे आहे.

तालुक्यातील अनेक रस्त्यांनी कधी डांबर पाहिलेलेही नव्हते. तेही रस्ते चकचकीत केलेले असून एकाच टप्प्यात ५१ नळ योजना मंजूर करून आणल्या आहेत. विकासकाम देताना मी मताचे राजकारण कधी केले नाही आणि करणारही नाही. विकासाच्या पाठीशीच सामान्य माणूस उभा राहतो, यावर माझा ठाम विश्वास आहे.’’ माजी उपसरपंच तानाजी पवार यांनी प्रास्ताविक केले. सुनील पवार यांनी सूत्रसंचालन केले. महेश पाटील यांच्यासह कोरोनाच्या काळात उत्कृष्ट कामगिरीबद्दल संदीप सुतार तसेच सायली कोळेकर, गिर्यारोहक संदीप भिंगारदेवे आदींचा मंत्री देसाई यांच्या हस्ते सत्कार करण्यात आला.