'बळीराजा'चा कारखाने बंद पाडण्याचा इशारा

कऱ्हाड (जि. सातारा) : मागील हंगामात गाळप झालेल्या उसाची एफआरपी अद्यापही काही कारखान्यांनी पूर्ण केलेली नाही. तरीही यंदाच्या गळीत हंगामाची तयारी कारखान्यांनी सुरू केली आहे. मागील गळीत हंगामातील एफआरपी कारखाने देत नाहीत, तोपर्यंत साखर आयुक्तांच्या आदेशानुसार कारखाने सुरू करू देऊ नये. त्याचबरोबर यंदा गाळपास येणाऱ्या उसास एफआरपीच्या वर किती दर देणार, हे जाहीर करून कारखाने सुरू करावेत, अन्यथा ऊसतोडी गनिमी काव्याने बंद पाडल्या जातील, असा इशारा बळिराजा शेतकरी संघटनेच्या वतीने देण्यात आला. 

संघटनेचे जिल्हाध्यक्ष साजिद मुल्ला, कामगार नेते अनिल घराळ, जिल्हा उपाध्यक्ष सुनील कोळी, विश्वास जाधव, प्रकाश पाटील व पदाधिकाऱ्यांनी प्रांताधिकारी उत्तम दिघे, पोलिस उपअधीक्षक डॉ. रणजित पाटील यांना आज निवेदन देण्यात आले. निवेदनातील माहिती अशी, कोरोनाच्या संकट काळात शेतकऱ्यांना अडचणींना सामोरे जावे लागले. मागील हंगामात गाळप झालेल्या उसाची एफआरपी अद्यापही काही कारखान्यांनी पूर्ण केली नाही. तरीही यंदाच्या हंगामाची तयारी कारखान्यांनी सुरू केली आहे. मागील गळीत हंगामाच्या उसाची एफआरपी राहिलेले कारखाने देत नाहीत, तोपर्यंत साखर आयुक्तांच्या आदेशानुसार ते कारखाने सुरू करण्याची परवानगी देऊ नये.

सातारकरांनाे सावधान! आवश्यकता असल्यास घराबाहेर पडा 

यंदाच्या गळिताची सर्व कारखान्यांनी तयारी सुरू केली आहे. कारखान्यांनी यंदा गाळपास येणाऱ्या उसाला एफआरपीपेक्षा अधिक किती रक्कम देणार, हे जाहीर करावे. त्यासाठी तातडीने कारखान्याचे अध्यक्ष, निर्णय घेण्याचे अधिकार असणारे अधिकारी, शेतकरी संघटनांचे पदाधिकाऱ्यांची जिल्हाधिकाऱ्यांच्या अध्यक्षतेखाली बैठक बोलावावी. तरच ऊस दरासंदर्भात चर्चा होऊन प्रश्न मिटेल. दर जाहीर न करताच साखर कारखाने सुरू करण्याचा प्रयत्न कारखानदारांनी केला, तर बळिराजा शेतकरी संघटना कारखान्यांच्या ऊसतोडी गनिमी काव्याने रोखून कारखाने बंद पाडू, असा इशाराही देण्यात आला आहे. 

संपादन : बाळकृष्ण मधाळे