फायनान्सच्या अधिकाऱ्यांना झोडपून काढू : बळिराजा शेतकरी संघटना आक्रमक

कऱ्हाड (जि. सातारा) : फायनान्स कंपन्यांनी सक्तीची कर्जवसुली चालवली आहे. ती तत्काळ थांबवण्यासाठी प्रांताधिकारी यांनी संबंधित कंपनीच्या अधिकाऱ्यांसमवेत बैठक घ्यावी, अशी मागणी बळिराजा शेतकरी संघटनेच्या वतीने प्रांताधिकारी उत्तम दिघे यांच्याकडे निवेदनाव्दारे केली. दरम्यान, सक्तीची वसुली अशीच सुरू ठेवल्यास बळिराजा शेतकरी संघटना वसुली अधिकाऱ्यांना झोडपून काढेल, असा इशाराही संघटनेचे जिल्हाध्यक्ष साजिद मुल्ला यांनी दिला आहे. 

निवेदनातील माहिती अशी, कोरोना आणि लॉकडाउनमुळे उद्योगधंदे बंद पडले आहेत. सामान्य लोकांच्या हाताला काम नसल्यामुळे दोन वेळचे जेवण मिळणेही मुश्‍कील झाले आहे. काही महिला बहिणींनी फायनान्स कंपन्यांकडून घरगुती कारणासाठी कर्ज घेतले आहे. कोरोनाचा संसर्ग नव्हता तेव्हा महिलांनी वेळेवर हप्ते भरले. मात्र, कोरोनामध्ये आर्थिक अडचण झाली. त्यामुळे त्यांना हप्ते भरता आले नाहीत. परिणामी फायनान्स कंपन्यांनी कर्जवसुलीचा तगादा लावला आहे. काही वसुली कर्मचारी महिलांना असभ्य भाषेत शिवीगाळ, दमदाटी करत आहेत. अशी सक्तीची कर्जवसुली करणाऱ्यांना वेळीच चाप लावावा. 

काळजी करु नका! नोव्हेंबरपर्यंत भरा जवाहर नवोदयचा परीक्षा फॉर्म!

राज्य शासनाने, विभागीय आयुक्त सौरभ राव यांनी सक्तीची कर्जवसुली करू नका, अन्यथा संबंधितांवर कारवाई करण्याचे आदेश दिले आहेत. तरीही सक्तीची कर्जवसुली सुरू आहे. त्याविरोधात आम्ही आंदोलन करणार आहोत. तत्पूर्वी मायक्रो फायनान्सचे अधिकारी व संघटनेच्या पदाधिकाऱ्यांची बैठक घ्यावी, अशी मागणी जिल्हाध्यक्ष मुल्ला, कामगार नेते अनिल घराळ, उपाध्यक्ष सुनील कोळी, गणेश पवार, विनोद डुबल, संदीप लोंढे व महिलांनी प्रांताधिकारी दिघे यांच्याकडे केली. दरम्यान, कोरोनाचे संकट मोठे आहे. आयुक्तांनी सक्तीची कर्जवसुली करू नका, असे आदेश दिले असताना फायनान्स कंपन्यांकडून सक्तीची कर्जवसुली सुरू आहे. अशीच वसुली सुरू राहिल्यास बळिराजा शेतकरी संघटना वसुली अधिकाऱ्यांना झोडपून काढेल, असा इशाराही मुल्ला यांनी दिला. 

संपादन : बाळकृष्ण मधाळे