प्राथमिक आरोग्य केंद्रातील शिपायाची गळफास घेऊन आत्महत्या

काले : येथील प्राथमिक आरोग्य केंद्रातील शिपाई हेमंत राजाराम पाटील (वय ५१) यांनी दवाखान्याच्या पाठीमागील शासकीय इमारतीच्या खोलीत गळफास घेऊन आत्महत्या केल्याची घटना आज दुपारी साडेतीन वाजण्याच्या सुमारास घडली. या घटनेने गाव परिसर हादरून गेला आहे. घटनेची माहिती मिळताच अनेकांनी आरोग्य केंद्रात मोठी गर्दी केली होती.

काही दिवसा पूर्वी प्राथमिक आरोग्य केंद्रातील आरोग्य कर्मचारी यांच्यात वाद झाल्याची चर्चा नागरिक सुरू होती. त्याबाबत गट विकास अधिकारी व तालुका आरोग्य अधिकारी यांच्याकडे बदलीसाठी तक्रार करण्यात आली होती. चार दिवसांपूर्वी येथे अधिकारी यांनी भेट देऊन सविस्तर माहिती घेतली होती. मात्र आज दुपारी पाटील यांनी गळफास लावून आत्महत्या केल्याने सर्वत्र खळबळ उडाली आहे. या आरोग्य केंद्रातील हा पहिलाच प्रकार घडला आहे. त्यामुळे त्याची सर्वत्र चर्चा सुरू आहे. पाटील यांचे मूळ गाव काले (चपनेमळी) आहे. या घटनेची पोलिसात नोंद करण्याचे काम सुरू आहे.