भाजपच्या सुनील काळेकरांची नगरसेवकपदी बिनविरोध निवड

सातारा : सातारा नगरपालिकेच्या स्वीकृत नगरसेवकपदी आज (ता. २१) भाजपच्या कोट्यातून सुनील काळेकर यांची निवड करण्यात आली. निवडीची औपचारिकता पार पडल्यानंतर काळेकर यांचा नगराध्यक्षा माधवी कदम, उपनगराध्यक्ष किशोर शिंदे यांनी त्यांचा सत्कार केला. 

भाजपच्या कोट्यातील स्वीकृत नगरसेवक विकास गोसावी यांनी राजीनामा दिल्यानंतर त्या जागेसाठीचा निवडणूक कार्यक्रम प्रांताधिकारी मीनाज मुल्ला यांनी जाहीर केला होता. यानुसार काल भाजपच्या वतीने सुनील काळेकर यांनी आपला उमेदवारी अर्ज सादर केला होता. त्यांचा एकमेव अर्ज दाखल झाल्याने काळेकर यांच्या निवडीची औपचारिकता बाकी उरली होती.

कायदा सुव्यवस्थेसाठी पोलिसांना लागेल ते सहकार्य करु : उदयनराजे

बुधवारी या निवडीची औपचारिकता पार पाडण्यासाठी सातारा पालिकेच्या छत्रपती शिवाजी सभागृहात नगराध्यक्षा माधवी कदम यांच्या अध्यक्षतेखाली विशेष ऑनलाइन सभेचे आयोजन करण्यात आले होते. निवडणूक प्रक्रियेनुसार सर्व शासकीय सोपस्कार पार पडल्यानंतर नगराध्यक्षा माधवी कदम यांनी काळेकर यांची स्वीकृत नगरसेवकपदी बिनविरोध निवड झाल्याची घोषणा केली. यानंतर पालिकेच्या वतीने काळेकर यांचा नगराध्यक्षा माधवी कदम यांनी सत्कार केला. यावेळी उपनगराध्यक्ष किशोर शिंदे, नगरसेवक धनंजय जांभळे, विजय काटवटे, सिध्दी पवार व इतर पदाधिकारी उपस्थित होते. 

संपादन : बाळकृष्ण मधाळे