esakal | माणमध्ये नळजोडणी उद्दिष्ट 100 टक्के पूर्ण करा; संतोष धोत्रेंच्या अधिकाऱ्यांना सूचना
sakal

बोलून बातमी शोधा

माणमध्ये नळजोडणी उद्दिष्ट 100 टक्के पूर्ण करा; संतोष धोत्रेंच्या अधिकाऱ्यांना सूचना

जलजीवन मिशन अंतर्गत माण तालुक्‍यातील सर्व ग्रामपंचायतीअंतर्गत सर्व कुटुंबांना, तसेच शासकीय कार्यालयांना नळजोडणी उद्दिष्ट 100 टक्के पूर्ण करावे, असे आवाहन अतिरिक्त मुख्य कार्यकारी अधिकारी संतोष धोत्रे यांनी केले.

माणमध्ये नळजोडणी उद्दिष्ट 100 टक्के पूर्ण करा; संतोष धोत्रेंच्या अधिकाऱ्यांना सूचना

sakal_logo
By
रूपेश कदम

दहिवडी (जि. सातारा) : जलजीवन मिशन अंतर्गत माण तालुक्‍यातील सर्व ग्रामपंचायतीअंतर्गत सर्व कुटुंबांना, तसेच शासकीय कार्यालयांना नळजोडणी उद्दिष्ट 100 टक्के पूर्ण करावे. तसेच स्वच्छ भारत अभियानांतर्गत नवीन वाढीव शौचालयांचे बांधकाम पूर्ण करावे, असे प्रतिपादन सातारा जिल्हा परिषदेचे अतिरिक्त मुख्य कार्यकारी अधिकारी संतोष धोत्रे यांनी केले. 

माण पंचायत समितीच्या येथील कार्यालयात आयोजित जलजीवन मिशन व स्वच्छ भारत अभियान आढावा बैठकीत श्री. धोत्रे बोलत होते. या बैठकीस पाणीपुरवठा व स्वच्छता विभागाचे उपमुख्य कार्यकारी अधिकारी किरण सायमुते, जिल्हा परिषदेचे कार्यकारी अभियंता सुनील शिंदे, गटविकास अधिकारी सर्जेराव पाटील यांच्यासह विस्तार अधिकारी, ग्रामविकास अधिकारी, शाखा अभियंता व पंचायत समिती माणचे पाणीपुरवठा व स्वच्छता विभागाचे सर्व कर्मचारी उपस्थित होते. 

कोयनावासीयांनी पाळला काळा दिवस; भूकंपाच्या आठवणी आजही ताज्या

श्री. धोत्रे म्हणाले, ""जलजीवन मिशन व स्वच्छ भारत अभियानांतर्गत तालुक्‍यातील सर्व ग्रामपंचायत कार्यक्षेत्रातील सर्व शाळा, अंगणवाडी, प्राथमिक आरोग्य केंद्र, उपकेंद्र कार्यालय, तसेच कुटुंबांना जोडणी उद्दिष्ट माहे मार्चअखेर 100 टक्के पूर्ण करावे. तसेच नवीन वाढीव कुटुंबांचे वैयक्तिक शौचालयांचे बांधकाम पूर्ण करावे. सर्व ग्रामपंचायतींनी घनकचरा सांडपाणी अंतर्गत 100 टक्के शोषखड्डा मोहीम राबवावी. नवीन सार्वजनिक शौचालय प्रस्ताव सादर करावेत.'' किरण सायमुते यांनी जलजीवन मिशन व स्वच्छ भारत अभियानांतर्गत सर्व योजना ग्रामीण भागात तळागाळापर्यंत राबवून ग्रामीण भागातील जनतेला शासनाच्या सर्व योजनांचा लाभ मिळवून देण्यासाठी प्रयत्न करावा व शासनाचे उद्दिष्ट पूर्ण करावे, असे आवाहन उपस्थितांना केले. सर्जेराव पाटील व सुनील शिंदे यांनी सदरचे उद्दिष्ट पूर्ण करण्याबाबत उपस्थितांना मार्गदर्शन केले. विस्तार अधिकारी बाळासाहेब भोसले यांनी प्रास्ताविक केले. विस्तार अधिकारी हृदयनाथ भोईटे यांनी आभार मानले. 

संपादन : बाळकृष्ण मधाळे