कृष्णा हॉस्पिटलचे कार्य कौतुकास्पद; राज्यमंत्री डॉ. भारती पवार

कऱ्हाड : कोरोनाच्या(corona) दोन्ही लाटेत कृष्णा(krishna hospital) अभिमत विद्यापीठासह कृष्णा हॉस्पिटलने कोरोनाग्रस्त रुग्णांची परिवाराप्रमाणे काळजी घेतली. त्यांचे कार्य कौतुकास्पद आहे, असे प्रतिपादन केंद्रीय आरोग्य व कुटुंबकल्याण राज्यमंत्री डॉ. भारती पवार ( dr. bharati pawar)यांनी केले. देशाचे माजी पंतप्रधान भारतरत्न अटलबिहारी वाजपेयी(atal bihari wajpayee) यांच्या जयंतीनिमित्त आयोजित सुशासन दिवस कार्यक्रमासाठी त्या कऱ्हाड दौऱ्यावर आल्या होत्या. मंत्री डॉ. पवार यांनी आज कृष्णा अभिमत विद्यापीठाला भेट दिली. त्या वेळी त्या बोलत होत्या.

या वेळी विद्यापीठाचे कुलपती डॉ. सुरेश भोसले यांनी स्वागत केले. याप्रसंगी भाजपचे प्रदेश कार्यकारिणी सदस्य अतुल भोसले, गौरवी भोसले उपस्थित होते. या वेळी विद्यापीठाच्या मुख्य प्रशासकीय इमारतीत पत्रकारांशी संवाद साधला. त्या वेळी त्यांनी कृष्णा अभिमत विद्यापीठ आणि कृष्णा हॉस्पिटलचे कौतुक केले. कृष्णा हॉस्पिटलने कोरोनाकाळात खूप चांगले काम केले. फक्त कोरोनाग्रस्त रुग्णांचीच नाही, तर या रुग्णांना सेवा देणाऱ्या डॉक्टर्स, कर्मचाऱ्यांचीही तितकीच काळजी घेतली. त्यांच्या या कार्याचे कौतुक करावे तेवढे थोडे आहे. कृष्णा हॉस्पिटलमधील कॅन्सर विभाग अद्ययावत असून, मुंबईनंतर सर्वप्रकारच्या अद्ययावत सेवा इथं उपलब्ध आहेत. याशिवाय इतर विभागही अद्ययावत असून, ग्रामीण भागातील रुग्णांसाठी हे इस्पितळ एक वरदान ठरले आहे, असे त्यांनी सांगितले. डॉ. पवार यांचे सहायक डॉ. ओमप्रकाश शेटे, कृष्णा विद्यापीठाचे कुलसचिव डॉ. एम. व्ही. घोरपडे, कृष्णा हॉस्पिटलचे वैद्यकीय संचालक डॉ. ए. वाय. क्षीरसागर, सहायक कुलसचिव एस. ए. माशाळकर आदी उपस्थित होते.