पहिला बिबट्या जेरबंद होताच, दुसरा पुन्हा शिवारात; ग्रामस्थ भयभीत

कऱ्हाड (सातारा) : ऊस तोडणीसाठी आलेल्या मजुराच्या अवघ्या चार वर्षाच्या मुलाला बिबट्यानं ठार केल्याची घटना आठवड्यापूर्वी येणके (ता. कऱ्हाड) या गावात घडली होती. त्यामुळं तिथं वनविभागानं लावलेल्या पिंजऱ्यात आज शनिवारी पहाटेच्या सुमारास एक बिबट्या (Leopard) जेरबंद करण्यात वन विभागाला यश आलं. मात्र, या बिबट्याला वन विभागानं (Forest Department) ताब्यात घेऊन सुरक्षित स्थळी सोडण्यासाठी नेल्यावर काही वेळातच पुन्हा दुसरा बिबट्या तिथं हजर झाल्यानं ग्रामस्थांत पुन्हा दहशत निर्माण झालीय.

काही ग्रामस्थांनी त्याला पाहिले असून पुन्हा ग्रामस्थांत भीतीचे वातावरण निर्माण झाले आहे. येणके गावच्या शिवारात गेल्या अनेक दिवसांपासून बिबट्यांचा मुक्काम आहे. त्याचा बंदोबस्त करावा, अशी मागणी ग्रामस्थांनी अनेकदा केली होती. मात्र, बिबट्यांच्या बंदोबस्तासाठी पिंजरा लावण्यात आलेला नव्हता. मागील आठवड्यात येणके ते किरपे या रस्त्याच्या दरम्यान असलेल्या उसाच्या शिवारात ऊस तोडणी मजुराच्या अवघ्या चार वर्षाच्या मुलावर हल्ला करून बिबट्यानं त्याला ठार मारलं होतं. त्यानंतर वन विभागानं संबंधित ठिकाणी शिवारात पिंजरा लावला होता. त्यामध्ये आज पहाटेच्या सुमारास बिबट्याला जेरबंद करण्यात वन विभागाला यश आलंय.

दरम्यान, जेरबंद केलेल्या बिबट्याला वन विभागानं ताब्यात घेऊन सुरक्षित स्थळी सोडण्यासाठी नेल्यावर काही वेळातच पुन्हा दुसरा बिबट्या तिथं हजर झाल्यानं ग्रामस्थांत पुन्हा दहशत निर्माण झालीय. बॅंकेतील राहुल कदम व अन्य युवकांनी संबंधित बिबट्याला डोंगराकडील शिवाराकडं धूम ठोकताना नुकतेच पाहिले आहे. त्यामुळं पुन्हा ग्रामस्थांत भीतीचे वातावरण निर्माण झालेय. वन विभागानं संबंधित बिबट्याचाही बंदोबस्त करावा, अशी मागणी ग्रामस्थांनी केलीय.