'कोयना जलविद्युत'ला बळकटी शक्‍य; मुख्यमंत्र्यांच्या दौऱ्याने नवीन प्रकल्पाला मिळणार गती!

कोयनानगर (जि. सातारा) : मुख्यमंत्री उद्धव ठाकरे यांनी कोयना धरणासह जलविद्युत प्रकल्पाची पाहणी केली. त्या वेळी कोयना अधिक सक्षम करण्यासाठी अधिकाऱ्यांना काही सूचना केल्या आहेत. जलविद्युत प्रकल्पातून पूर्ण क्षमतेने वीजनिर्मिती करून नवीन प्रकल्पाची आखणी करावी, याकडे मुख्यमंत्र्यांनी लक्ष वेधले आहे. त्यामुळे विजेच्या माहेरघरात येऊन प्रत्यक्ष केलेल्या चाचपणीमुळे कोयना प्रकल्प अधिक सक्षम होण्यास हातभार लागणार आहे. 

पावसाळी अधिवेशनानंतर कोयना धरणाबाबत राज्य शासन काही महत्त्वाचे निर्णय घेण्याच्या मार्गावर आहे. राज्य विजेबाबत स्वयंपूर्ण करण्यासाठी मुख्यमंत्री ठाकरे यांनी प्रत्यक्ष कोयना धरणाच्या भिंतीवर येऊन चाचपणी केली. कोयना जलविद्युत प्रकल्पाची पाहणी करताना मुख्यमंत्री ठाकरे यांनी समाधान व्यक्त केले. कोयना जलविद्युत प्रकल्पातून पूर्ण क्षमतेने वीजनिर्मिती करावी, अशा सूचना प्रकल्पाच्या अधिकाऱ्यांना त्यांनी दिल्या. नवीन प्रकल्पांची आखणी करण्याचे आदेशही दिले आहेत. 

कोयनावासीयांनी पाळला काळा दिवस; भूकंपाच्या आठवणी आजही ताज्या

कोयना जलविद्युत प्रकल्पाच्या चार टप्प्यांतून दोन हजार मेगावॉट वीजनिर्मिती होते. त्यातील एक हजार मेगावॉट क्षमतेचा चौथा टप्पा राज्याच्या उद्योगासाठी महत्त्वाचा आहे. त्यामुळे जलविद्युत निर्मिती फायद्याची आहे. कोयनेचे अजून सहा टप्पे प्रस्तावित आहेत. त्या प्रकल्पांच्या माध्यमातून सात हजार मेगावॅट वीजनिर्मिती प्रस्तावित आहे. त्या प्रकल्पाला मंजुरी दिल्यावर विजेचे माहेरघर ही कोयनेची ओळख गडद होणार आहे. त्यामुळे त्यालाही चालना देण्याच्या दृष्टीने मुख्यमंत्री ठाकरे यांचा दौरा विशेष महत्त्वाचा ठरणार आहे. 

संपादन : बाळकृष्ण मधाळे