Alcohol : वाठारला बाटली राहणार आडवीच; गावात वाईन शॉप, बीअर बारला विरोध

कऱ्हाड - वाठार (जि. सातारा) येथे काल बुधवारी झालेल्या महिलांच्या ग्रामसभेत देशी- विदेशी दारू, वाईन शॉप, बियर बारला विरोध दर्शवण्यात आला. आज गुरुवारी झालेल्या पुरुषांच्या ग्रामसभेतही सर्व उपस्थितांनी एकमुखाने हातवर करून त्याला विरोध केला. त्यामुळे आता वाठार येथे बाटली आडवीच राहणार आहे.

गावात देशी- विदेशी दारू दुकान (वाईन शॉप) आणि बिअर बारला परवानगी देण्यावर चर्चा करण्यासाठी वाठार ग्रामपंचायतीने महिला व पुरूषांची स्वतंत्र ग्रामसभा आयोजित केली होती. सरपंच शोभाताई पाटील, उपसरपंच बाळासाहेब पाटील, ग्रामपंचायत सदस्य अभिजीत मोरे, रंजना माने, स्वप्निल कानडे, अभिजीत पाटील, ग्रामसेवक रियाज मोमीन, लिपीक अनिकेत माने यांच्यासह पुरुष, महिला उपस्थित होत्या. ग्रामसेवक मोमीन यांनी विषय पत्रिकेचे वाचन केले.

वाठार येथील एकाने स्वः मालकीच्या जागेत बिअर बार व दारू दुकान सुरू करण्यासाठी ना हरकत दाखल मिळावा, असा अर्ज ग्रामपंचायतीकडे केला होता. त्याला दाखला द्यायचा की नाही यासाठी तेथे काल महिलांची ग्रामसभा घेण्यात आली. त्यात कालच्या सभेला 180 महिला उपस्थित होत्या. तर आज 140 पुरूष उपस्थित होते. त्यापैकी 75 पुरूषांनी बार, दारू दुकान व्हावे या ठरावाच्या विरोधात हात वर केला. तर 22 पुरूषांनी ठरावच्या बाजूने मतदान केले. तर उर्वरीत 43 जणांनी तटस्थ भूमिका घेतली. त्यामुळे आता वाठार गावात यापुढे बार, देशी- विदेशी दारू किंवा वाईन शॉप होवू नये यावर ग्रामस्थांचे बहुमत झाले आहे. परिणामी गावात आता दारुची बाटली आडवीच राहणार आहे.