Rapid Charging : आता बिनधास्त घ्या इलेक्ट्रिक गाडी! केवळ १५ मिनिटात होणार चार्ज; भारतीय कंपनीचं नवीन तंत्रज्ञान!

सध्या इलेक्ट्रिक वाहनांची मागणी मोठ्या प्रमाणात वाढत आहे. मात्र, एक मोठा वर्ग असा आहे जो या कार्सकडे पाठ फिरवतो. प्रदूषण कमी करण्यासाठी ईव्ही घेण्याचा विचार तर बरेच जण करतात; मात्र त्याच्या चार्जिंगसाठी लागणारा वेळ आणि रेंज पाहून मग तो विचार बदलतात.

बंगळुरूमधील एका कंपनीने आता हीच समस्या सोडवली आहे. एक्स्पोनेंट एनर्जी नावाच्या कंपनीने एका रॅपिड चार्जिंग टेकनिकचा शोध लावला आहे. यामुळे कोणत्याही प्रकारचं इलेक्ट्रिक वाहन केवळ १५ मिनिटांमध्ये चार्ज करता येणं शक्य होणार आहे.

तीन वर्षांपूर्वी सुरू करण्यात आलेली एक्स्पोनेंट एनर्जी ही कंपनी सध्या तीन गोष्टींवर काम करत आहे. यामध्ये ई-पॅक (बॅटरी पॅक), ई-पंप (चार्जिंग स्टेशन) आणि ई-प्लग (चार्जिंग कनेक्टर) यांचा समावेश आहे. या गोष्टींच्या मदतीने अगदी मोठ्या बसची बॅटरीही केवळ १५ मिनिटांमध्ये फुल चार्ज होऊ शकते असा दावा कंपनीने केला आहे. (Electric Vehicle Charging)

असं आहे तंत्रज्ञान

लिथियम प्लेटिंग आणि वाढणारी हीट ही आपल्यासमोरील मुख्य आव्हानं होती, असं कंपनीने सांगितलं आहे. एक्स्पोनेंट एनर्जीने (Exponent Energy) तयार केलेली बॅटरी मॅनेजमेंट सिस्टीम (BMS) ही व्हर्चुअल सेल मॉडेल आणि डायनॅमिक चार्जिंग अल्गोरिदमचा वापर करते. या माध्यमातून फास्ट चार्जिंगवेळी लिथियम प्लेटिंगमुळे होणारं सेल डिग्रेडेशन रोखता येतं.

बॅटरी होणार नाही गरम

फास्ट चार्जिंगवेळी बॅटरी वेगाने गरम होण्याचा प्रकारही दिसून येतो. यामुळे कित्येक ईव्हींमध्ये आगीच्या घटना घडल्या आहेत. मात्र, कंपनीने तयार केलेल्या HVAC सिस्टीममुळे फास्ट चार्जिंगवेळी निर्माण होणारी हीट कमी होते.

या सिस्टिममध्ये लिथियम-आयन सेलला थंड ठेवण्यासाठी रेफ्रिजिरेटेड पाण्याचा वापर होतो. यामुळे कोणत्याही परिस्थितीमध्ये अ‍ॅम्बियंट तापमान हे 35 अंश सेल्सिअसच्या वर जात नाही. यामुळे बॅटरी अधिक गरम होण्यापासून रोखता येतं.

बंगळुरूमध्ये उभारले चार्जिंग स्टेशन

एक्स्पोनेंट कंपनीने गेल्या तीन महिन्यांमध्ये बंगळुरूमध्ये २५ हजारांहून अधिक रॅपिड चार्जिंग सेशन पूर्ण दावा केला आहे. यामध्ये कंपनीच्या नवीन तंत्रज्ञानाचा वापर करून २०० हून अधिक वाहनांना चार्ज करण्यात आलं आहे. सध्या बंगळुरूमध्ये कंपनीचे ३० चार्जिंग स्टेशन आहेत. यातील २० स्टेशन हे फ्रँचायजी मार्फत चालवले जातात. कंपनीने याबाबत माहिती दिली आहे.