Airtel Satellite Internet : एअरटेलने दिली खुशखबर अन् स्टारलिंकला धक्का; भारतात लाँच होणार उपग्रह इंटरनेट सेवा, नेमकं काय खास?

भारतासारख्या मोठ्या डिजिटल बाजारपेठेत उपग्रह इंटरनेट सेवांचा विस्तार होण्याच्या दिशेने मोठी पावले उचलली जात आहेत. जगभरातील इंटरनेट क्षेत्रात आघाडीवर असलेल्या एलोन मस्कच्या स्टारलिंकने भारतात आपली सेवा सुरू करण्याची तयारी केली असतानाच, भारती एअरटेलने त्यापूर्वीच भारतात उपग्रह इंटरनेट सेवा सुरू करण्यासाठी मोठे पाऊल उचलले आहे.

एअरटेलच्या आंतरराष्ट्रीय उपग्रह सेवांचा विस्तार

भारती एंटरप्रायझेसचे उपाध्यक्ष राजन भारती मित्तल यांनी ANI सोबत झालेल्या मुलाखतीत सांगितले की, एअरटेलने गुजरात आणि तमिळनाडू येथे आपली दोन बेस स्टेशनची निर्मिती पूर्ण केली आहे. आता फक्त केंद्र सरकारकडून आवश्यक मंजुरी मिळण्याची वाट पाहिली जात आहे. मंजुरी मिळाल्यावर भारतातील उपग्रह इंटरनेट सेवा तत्काळ सुरू केली जाईल, असे मित्तल यांनी स्पष्ट केले.

एअरटेलने आतापर्यंत 635 उपग्रह प्रक्षेपित केले आहेत, आणि त्यांचा वापर आंतरराष्ट्रीय बाजारात केला जात आहे. कंपनी आता भारतातील दुर्गम आणि ग्रामीण भागांमध्ये देखील "योग्य किंमतीत" उपग्रह इंटरनेट सेवा देण्याच्या तयारीत आहे. यामुळे इंटरनेटची उपलब्धता आणि प्रवेशक्षमता वाढेल.

स्टारलिंकसाठी आव्हान

स्टारलिंकदेखील भारतात उपग्रह इंटरनेट सेवा सुरू करण्यासाठी उत्सुक आहे, मात्र अद्याप सरकारकडून त्यांना मंजुरी मिळालेली नाही. तसेच, स्टारलिंकच्या सेवांच्या किमती तुलनेने अधिक असल्यामुळे एअरटेलच्या परवडणाऱ्या दरांच्या धोरणाला मोठा प्रतिसाद मिळण्याची शक्यता आहे.

Jio, BSNL आणि Airtel यांच्याकडून नव्या ICR सुविधेचा लाभ

याच दरम्यान, भारत सरकारने 17 जानेवारी रोजी "इन्ट्रा सर्कल रोमिंग (ICR)" सुविधा सुरू केली आहे. या सुविधेमुळे Jio, BSNL आणि Airtel यांचे युजर्स सिग्नल उपलब्ध नसतानाही अन्य नेटवर्कद्वारे कॉल करू शकणार आहेत. डिजिटल भारत निधी (DBN) द्वारे वित्तपुरवठा केलेल्या 4G मोबाइल साइट्समुळे ही सुविधा शक्य झाली आहे.

ICR सुविधेचे फायदे

सहकार्याचे नेटवर्क: सरकारी निधीतून उभारलेल्या टॉवरचा वापर सर्व कंपन्यांकडून केला जाऊ शकतो, ज्यामुळे युजर्सला कोणत्याही नेटवर्कवर 4G सेवा मिळू शकते.

टॉवरची गरज कमी: एका टॉवरवर अनेक कंपन्यांच्या नेटवर्कची सेवा देणे शक्य असल्यामुळे नवीन टॉवर उभारणीचा खर्च व वेळ वाचतो.

चांगल्या सेवा: या सहकार्यामुळे दुर्गम भागातही जलदगती सेवा उपलब्ध होणार आहेत.

भारतीय इंटरनेट बाजारपेठ आता एका नव्या युगात प्रवेश करत आहे. एअरटेलच्या उपग्रह इंटरनेट सेवेमुळे भारतातील दुर्गम भागांपर्यंत इंटरनेट पोहोचेल. तसेच, ICR सुविधेमुळे वापरकर्त्यांचा अनुभव अधिक सुधारेल. हे बदल भारताच्या डिजिटल क्रांतीत महत्त्वाची भूमिका बजावतील.