Antarctica Penguin : ग्लोबल वॉर्मिंगमुळे नष्ट होतायत अंटार्क्टिकावरील पेंग्विन; बर्फ वितळल्यामुळे लाखो नवजात पेंग्विन्सचा मृत्यू

Antarctica Emperor Penguins : अंटार्क्टिकावरील प्रसिद्ध प्राणी म्हणजे एम्पेरर पेंग्विन. या संपूर्ण खंडावर त्यांचंच राज्य चालतं. मात्र याच पेंग्विन्सची संख्या आता अगदी कमी होत चालल्याचं समोर आलं आहे. ग्लोबल वॉर्मिंगमुळे याठिकाणचा बर्फ मोठ्या प्रमाणात वितळतोय, आणि त्यामुळेच पेंग्विन्स ब्रीडिंग करू शकत नसल्याचं ब्रिटिश अंटार्क्टिक सर्वेक्षणात स्पष्ट झालं आहे.

हे सर्वेक्षण करणाऱ्या वैज्ञानिकांपैकी एक पीटर फ्रेटवेल यांनी सांगितलं, की एम्पेरर पेंग्विन ही जगातील सगळ्यात मोठी पेंग्विन प्रजाती आहे. हे पेंग्विन केवळ अंटार्क्टिकामध्ये आढळतात. हे पेंग्विन समुद्राच्या कडेला तयार झालेल्या बर्फात आपली अंडी देतात. यावेळी जर हा कडेचा बर्फ तुटला किंवा वितळला, तर ती अंडी किंवा नवजात पेंग्विन समुद्रात पडतात आणि मरुन जातात. आज तकने याबाबतचं वृत्त प्रसिद्द केलं आहे.

2023 साली याठिकाणी कमी बर्फामुळे सुमारे 14 पेंग्विन कॉलनीज ब्रीडिंग करू शकल्या नाहीत. ग्लोबल वॉर्मिंगमुळे ग्लेशियरच्या कडेचा बर्फ मोठ्या प्रमाणात वितळला आणि लाखो अंडी व नवजात पेंग्विनचा समुद्रात पडून मृत्यू झाला. गेल्या सात वर्षांपासून दरवर्षी हे प्रमाण वाढत चालल्याचंही या सर्वेक्षणात म्हटलं आहे.

2022 साली ग्लोबल वॉर्मिंगमुळे सुमारे 6 कॉलनीजना ब्रीडिंग करता आलं नव्हतं. एकाच वर्षात ही संख्या 14 वर गेली आहे. याच वेगाने बर्फ वितळत राहिला, तर या शतकाअखेर अंटार्क्टिकावरील 99 टक्के पेंग्विन्स नष्ट होतील अशी भीती पीटर यांनी व्यक्त केली. दुर्दैव म्हणजे, या सगळ्याला मानवच कारणीभूत असेल, असंही ते म्हणाले.