Chandrayaan 3 Live Streaming : लाईव्ह पाहता येणार 'चांद्रयान-3'ची लँडिंग; मोबाईलवर मिळेल नोटिफिकेशन! जाणून घ्या कसं?

Chandrayaan-3 Landing Live : भारताची महत्त्वाकांक्षी चांद्रमोहीम आता अंतिम टप्प्यात पोहोचली आहे. 'चांद्रयान-3' हे उद्या (23 ऑगस्ट) चंद्राच्या पृष्ठभागावर लँड करेल. संपूर्ण देशासाठी हा एक ऐतिहासिक आणि अभिमानाचा क्षण असणार आहे. या क्षणाचा साक्षीदार होण्याची तुम्हालाही संधी आहे. कारण, चांद्रयानाच्या लँडिंगचे थेट प्रक्षेपण सर्वांना पाहता येणार आहे.

बुधवारी सायंकाळी 5 वाजून 20 मिनिटांनी लँडिंगची प्रक्रिया आणि त्याचं थेट प्रक्षेपण सुरू केलं जाईल. घरी बसून टीव्हीवर हे लाईव्ह पाहण्यासाठी तुम्हाला डीडी नॅशनल हे चॅनल लावावं लागेल. तसंच, तुमच्या स्मार्टफोनवर देखील तुम्ही चांद्रयानाचं लँडिंग लाईव्ह पाहू शकता.

मोबाईलवर कसं पाहणार?

मोबाईलवर चांद्रयानाचं लाईव्ह प्रक्षेपण पाहण्यासाठी तुम्हाला इस्रोच्या फेसबुक किंवा यूट्यूब चॅनलवर जावं लागेल. यूट्यूबवर @isroofficial5866 या नावाने हे चॅनल आहे. सोबतच इस्रोच्या अधिकृत एक्स (ट्विटर) अकाउंटवरुन देखील तुम्ही लाईव्ह पाहू शकता. याव्यतिरिक्त नॅशनल जिओग्राफिक इंडियाच्या यूट्यूब चॅनलवरही तुम्ही चांद्रयान-3चं लँडिंग पाहू शकता

अशी मिळेल नोटिफिकेशन

चांद्रयान-3 च्या लँडिंगचं प्रक्षेपण सुरू झालं आहे, याची नोटिफिकेशन देखील तुम्हाला मोबाईलवर मिळू शकते. यासाठी तुम्हाला यूट्यूबवर इस्रोच्या पेजला सबस्क्राईब करून नोटिफिकेशन सुरू करावे लागतील. यानंतर लाईव्ह सुरू झाल्यानंतर यूट्यूब तुम्हाला त्याबाबत नोटिफिकेशन देईल.