Harley Davidson X440 : 'हार्ले'च्या सर्वात स्वस्त बाईकसाठी करावी लागणार घाई; 'या' दिवशी बंद होणार ऑनलाईन बुकिंग

हार्ले डेव्हिडसन कंपनीने काही दिवसांपूर्वी भारतात आपली नवीन बाईक लाँच केली होती. Harley Davidson X440 असं या बाईकचं नाव आहे. स्वदेशी बनावटीची असलेली ही हार्लेची सर्वात स्वस्त बाईक आहे. 3 जुलैपासून याचं ऑनलाईन बुकिंग सुरू झालं होतं.

ग्राहकांचा जोरदार प्रतिसाद

या गाडीला ग्राहकांचा जोरदार प्रतिसाद मिळाला असल्याचं कंपनीने स्पष्ट केलं आहे. कंपनीकडून अधिकृत आकडेवारी जारी केली नसली, तरीही मोठ्या प्रमाणात बुकिंग झाल्याचं हार्लेने म्हटलं आहे.

ऑनलाईन बुकिंग होणार बंद

सध्या हार्लेच्या ऑफिशिअल वेबसाईटवर आणि हीरो मोटोकॉर्पच्या डीलरशिपकडे तुम्ही या गाडीची बुकिंग करू शकता. यासाठी तुम्हाला 5,000 रुपये बुकिंग अमाउंट द्यावी लागेल. मात्र, तुम्हाला यासाठी घाई करण्याची गरज आहे. कारण, 3 ऑगस्टपासून ऑनलाईन बुकिंग बंद करण्यात येणार असल्याचं कंपनीने जाहीर केलं आहे. (Harley Davidson Bike)

किती आहे किंमत?

हार्ले-डेव्हिडसनची ही गाडी तीन व्हेरियंटमध्ये लाँच करण्यात आली आहे. यातील बेस व्हेरियंटची किंमत 2.29 लाख रुपयांपासून (एक्स शोरुम) सुरू होते. 400 सीसी क्षमतेच्या इतर गाड्यांच्या तुलनेत ही किंमत अगदीच परवडणारी आहे. शिवाय, हार्ले-डेव्हिडसन ही एक प्रतिष्ठित कंपनी आहे. यामुळेच या गाडीला जोरदार प्रतिसाद मिळत आहे.

ऑक्टोबरपासून डिलिव्हरी

ज्या ग्राहकांनी प्री-बुक केलं आहे, त्यांना सप्टेंबर महिन्यापासून या गाडीची टेस्ट ड्राईव्ह करण्याची संधी मिळेल. ऑक्टोबर महिन्यापासून या गाडीची डिलिव्हरी करण्याचा कंपनीचा मानस आहे. प्रायोरिटी बेसिसवर ग्राहकांना डिलिव्हरी मिळणार आहे.