HERO चा धमाका! महिन्यात 7 हजारहून अधिक इलेक्‍ट्रिक स्कूटरची विक्री

हिरो इलेक्‍ट्रिकने (Hero Electric) गेल्या महिन्यात धमालच केली आहे. देशातील सर्वात मोठी इलेक्‍ट्रिक दुचाकी (Electric Two Wheeler) असलेल्या हिरो इलेक्‍ट्रिकने गेल्या महिन्यात नोव्हेंबरमध्ये 7,000 हून अधिक वाहनांची विक्री केली. जे. एम. के. रिसर्च आणि वाहन डॅशबोर्डच्या ताज्या अहवालात असे म्हटले आहे. हिरो इलेक्‍ट्रिकने गेल्या वर्षी नोव्हेंबरमध्ये 1,169 वाहनांची विक्री केली होती.

सणासुदीमुळे विक्रीला मिळाली चालना

हिरो इलेक्‍ट्रिकचे म्हणणे आहे की, या विभागातील मागणी सातत्याने वाढत आहे आणि कंपनी ही मागणी सातत्याने पूर्ण करेल. कंपनीने म्हटले आहे की, सरकार सतत प्रोत्साहन देत आहे, ज्यामुळे इलेक्‍ट्रिक मोबिलिटीची मागणी अधिक मजबूत होत आहे. सणासुदीच्या मागणीमुळे इलेक्‍ट्रिक वाहनांच्या विक्रीत मोठी वाढ झाली आहे. कंपनीच्या सिटी-स्पीड श्रेणीतील कामगिरी उत्कृष्ट राहिली आहे.

सरकारचे प्रयत्न येताहेत फळाला

हिरो इलेक्‍ट्रिकचे सीईओ सोहिंदर गिल म्हणतात, आम्ही भारतात इलेक्‍ट्रिक वाहनांचा ट्रेंड चालवत आहोत. आम्ही इलेक्‍ट्रिक मोबिलिटी सोल्यूशन्सकडे ग्राहकांचा मजबूत आत्मविश्वास पाहत आहोत. सरकारचे प्रयत्न आणि ग्राहक- अनुकूल धोरणांमुळे इलेक्‍ट्रिक वाहन श्रेणीची मागणी वाढली आहे. इलेक्‍ट्रिक वाहनांच्या वाढत्या विक्रीदरम्यान मागणी पूर्ण करण्यासाठी आम्ही काम करत आहोत. आम्हाला खूप आशा आहे, की आम्ही या वर्षाचा शेवट उत्कृष्ट कामगिरीने करू.