Honor X9b : आता मोबाईल फुटणारच नाही? स्क्रीनमध्ये मिळणार चक्क 'एअरबॅग' टेक्नॉलॉजी, कधी होणार लाँच?

Honor X9b Airbag Technology : ऑनर कंपनी भारतात आणखी एक दमदार स्मार्टफोन लाँच करण्यासाठी सज्ज झाली आहे. कंपनी आतापर्यंतचा सगळ्यात मजबूत स्मार्टफोन लाँच करणार आहे. गेल्या कित्येक दिवसांपासून कंपनी आपल्या नव्या स्मार्टफोनला टीझ करत आहे. आता याबाबत आणखी एक खास बाब समोर आली आहे. या स्मार्टफोनमध्ये चक्क एअरबॅग टेक्नॉलॉजी देण्यात आली आहे.

ऑनरच्या या नवीन स्मार्टफोनचं नाव Honor X9b असं आहे. यासोबतच कंपनी आपले इअरबड्स आणि एक स्मार्टवॉच देखील लाँच करणार आहे. या सगळ्यांची लाँच डेट कंपनीने कन्फर्म केली आहे. (Honor X9b Launch Date)

तगडा आहे स्मार्टफोन

ऑनर एक्स 9b हा स्मार्टफोन अगदी मजबूत असणार आहे. कंपनीचे भारतातील प्रमुख माधव शेठ यांनी यापूर्वी हा स्मार्टफोन वेगवेगळ्या उंचीवरुन खाली आपटून दाखवला होता. तसंच या स्मार्टफोनवरुन चक्क थार ही चारचाकी गाडीदेखील नेऊन दाखवली होती. तरीही या स्मार्टफोनला स्क्रॅचही आला नसल्याचं व्हिडिओत दिसत होतं. (Honor X9b Strength)

एअरबॅग टेक्नॉलॉजी

कंपनीने आपल्या एक्स पोस्टमध्ये एअरबॅग टेक्नॉलॉजीचा उल्लेख केला आहे. हा भारतातील पहिला अशा स्मार्टफोन असणार आहे ज्याला एअरबॅग टेक्नॉलॉजी युक्त अल्ट्रा बाऊन्स डिस्प्ले देण्यात येईल. त्यामुळे आता टेम्पर्ड ग्लासला विसरून जा, असं कंपनीने आपल्या पोस्टमध्ये म्हटलं आहे.

कधी होणार लाँच?

याच पोस्टमध्ये दिलेल्या माहितीनुसार, 15 फेब्रुवारी 2024 रोजी हा स्मार्टफोन लाँच होणार आहे. लीक्समध्ये मिळालेल्या माहितीनुसार या स्मार्टफोनची किंमत 25 ते 30 हजारांच्या दरम्यान असण्याची शक्यता आहे. यामध्ये क्वालकॉम स्नॅपड्रॅगन 6 जेन 1 प्रोसेसर मिळण्याची शक्यता आहे.