Meta Translator Tool : मेटाने तयार केला 'युनिवर्सल ट्रान्सलेटर'! 100हून अधिक भाषांचा अनुवाद करता येणार

सोशल मीडिया जायंट कंपनी मेटाने एक नवीन एआय सिस्टीम मॉडेल तयार केलं आहे. हे एआय मॉडेल तब्बल 100 हून अधिक भाषांचा अनुवाद करू शकतं, असा दावा कंपनीने केला आहे. सीमलेस एमफोरटी असं या टूलचं नाव आहे.

विशेष म्हणजे SeamlessM4T हे स्पीच-टू-स्पीच आणि स्पीच-टू-टेक्स्ट अशा दोन्ही प्रकारच्या गोष्टींसाठी वापरता येईल. म्हणजेच, हे टूल लिहिलेल्या टेक्स्टचं भाषांतर करु शकेल. सोबतच, ऐकलेल्या गोष्टीचं टेक्स्टमध्ये रुपांतर करण्याची, आणि त्याचं भाषांतर करण्याची क्षमताही यात आहे.

अशा प्रकारचं एआय फीचर तयार करणं हे नक्कीच आव्हानात्मक होतं. कारण यात जवळपास 100 हून अधिक भाषांचा समावेश आहे. यामुळे वेगवेगळ्या भाषा बोलणाऱ्या लोकांना अधिक प्रभावीपणे संवाद साधता येणार आहे; असं मेटाने स्पष्ट केलं. सीमलेस M4T मधील आणखी एक महत्त्वाची गोष्ट म्हणजे, हे टूल सोर्स लँग्वेज आपोआप डिटेक्ट करू शकणार आहे.

इतर कंपन्यांचेही एआय टूल्स

अशाच प्रकारचे युनिवर्सल स्पीच मॉडेल इतर मोठ्या टेक कंपन्यांनी देखील सादर केलं. यामध्ये अमेझॉन, मायक्रोसॉफ्ट, ओपन एआय आणि इतर काही स्टार्टअप कंपन्यांचा समावेश होता. मोझिला कंपनीने देखील मेटाच्या सीमलेस M4T सारखीच एक एआय सिस्टीम तयार केली आहे.