YouTube Ads : यूट्यूबच्या जाहिराती पहाव्याच लागणार, अन्यथा अकाउंट होणार बंद! कंपनीने दिला गंभीर इशारा

यूट्यूब हे जगातील सर्वात मोठं आणि लोकप्रिय व्हिडिओ स्ट्रीमिंग प्लॅटफॉर्म आहे. याठिकाणी प्रत्येक सेकंदाला लाखो व्हिडिओ अपलोड होतात. या व्हिडिओंवर दिसणाऱ्या जाहिरातींच्या माध्यमातून यूट्यूब मोठ्या प्रमाणात पैसे कमावतं. हाच रेव्हेन्यू वाढवण्यासाठी आता कंपनीने मोठा निर्णय घेतला आहे.

यूट्यूबवर दिसणाऱ्या जाहिरातींचं प्रमाण गेल्या काही वर्षांमध्ये वाढलं आहे. जर जाहिराती नको असतील, तर त्यासाठी प्रीमियम प्लॅन्स देखील कंपनीने लाँच केले आहेत. कित्येक यूजर्स जाहिराती टाळण्यासाठी सबस्क्रिप्शन घेण्याऐवजी अ‍ॅड-ब्लॉकरचा वापर करतात. आता अशा यूजर्सना कंपनीने गंभीर इशारा दिला आहे.

अ‍ॅड-ब्लॉकर वापरणाऱ्या यूजर्सना आता यूट्यूब अ‍ॅक्सेस करता येणार नाही. अशा यूजर्सना कंपनी तीन वेळा वॉर्निंग देईल. त्यानंतरही जर कोणी अ‍ॅड-ब्लॉकर वापरत असेल तर अशा व्यक्तीचे अकाउंट ब्लॉक करण्यात येईल. यूट्यूब कंपनी जागतिक स्तरावर यासाठी मोहीम राबवणार आहे.

असा मिळेल इशारा

जर कोणी अ‍ॅड-ब्लॉकर वापरुन यूट्यूब व्हिडिओ पाहत असेल, तर कंपनी त्या व्यक्तीला स्क्रीनवर एक फ्लॅश मेसेज दाखवेल. तुम्ही कंपनीच्या पॉलिसींचं उल्लंघन करत आहात असं यामध्ये लिहिलेलं असेल. यासोबतच जाहिराती सुरू करा किंवा यूट्यूब प्रीमियम घ्या असे पर्यायही यामध्ये दिलेले असतील.