Dajipur Sanctuary : पर्यटकांसाठी आनंदाची बातमी! दाजीपूर अभयारण्य 'या' दिवशी होणार खुले, जंगल सफारीही होणार सुरू

राधानगरी : जागतिक वारसास्थळाचे कोंदण लाभलेले आणि जैवविविधतेने संपन्न राधानगरी-दाजीपूर वन्यजीव अभयारण्य (Radhanagari-Dajipur Wildlife Sanctuary) यंदाच्या पर्यटन हंगामात उद्या (१ नोव्हेंबर) पर्यटकांसाठी खुले होणार आहे. पावसाळ्यामुळे पाच महिने बंद राहिलेल्या ‘जंगल सफारी’ला प्रारंभ होईल.

पर्यटन हंगामाच्या चाहूलीने दाजीपूर पर्यटकांसाठी (Tourists) गजबजणार आहे. पर्यटकांसाठी डॉरमेटरी, तंबू निवास अँम्पीथिएटर, मोक्याच्या ठिकाणी निरीक्षण मनोरे, फुलपाखरू उद्यान, जैवविविधता पशुपक्षीविषयक माहिती केंद्र आदी सुविधांमुळे वर्षागणिक अभयारण्य क्षेत्रात येणाऱ्या पर्यटकांच्या संख्या वाढत आहे.

पर्यटन हंगाम सुरू होत असल्याने, पर्यटन व्यवसायालाही बरकत येणार आहे. ग्राम परिस्थितीकीय समितीच्या नियंत्रणाखाली भाडेतत्त्वावरील वाहनांमुळे सुरक्षित ‘जंगल सफारी’ व्यवस्था निर्माण झाली आहे. सध्या तीस जिप्सी जंगल सफारीसाठी तैनात आहेत. जंगल सफारी वाहन व्यवस्थेतून वन्यजीव विभागाने स्थानिकांना रोजगारासाठी नवीन संधीच मिळवून दिली आहे.

पर्यटकांसाठी पायाभूत सुविधांना प्राधान्य आणि ग्राम परिस्थितीकीय विकास समितीमार्फत पर्यटन व्यवस्थापन यंदाच्या पर्यटन हंगामाचे वैशिष्ट्य ठरणार आहे. अभयारण्य क्षेत्रात ठक्याचा वाडा येथे आणखी चार नवीन तंबू निवासाची उभारणी केली आहे. पर्यटकांसाठी दहा तंबू निवास उपलब्ध झाले आहेत. लवकरच दाजीपुरातील एमटीडीसीचे सर्व सुविधायुक्त अद्यायवत ‘हॉलिडे रिसॉर्ट’ पर्यटकांसाठी खुले होतील.

हे रिसॉर्ट पर्यटन विकास आणि पर्यटन सुविधांसाठी अत्यंत उपयुक्त ठरतील. पर्यटकांना खात्रीची व सुरक्षित निवास आणि भोजन व्यवस्था मिळण्याकडे विशेष लक्ष देण्यात येत आहे. भविष्यात नवे उपक्रम आणि निसर्ग पर्यटनात स्थानिकांचा सहभाग वाढीवर भर राहील.

-अजय माळी, वन्यजीव अधिकारी दाजीपूर