...अखेर 'त्यांच्या' प्रयत्नातून उजळणार गावच्या विकासवाटा!

नाशिक : (चांदवड) दरवर्षी शेतकऱ्यांना पावसाळ्यात गावातून शेतीत जाणे किंवा शेतमाल नेण्यासाठी कसरत करावी लागत होती. रस्ता खूपच खराब असल्याने वर्षानुवर्षे हाल होत असतांना अखेर शेतकऱ्यांनीच पुढाकार घेऊन घेतला 'हा' निर्णय...त्यामुळे होणारी कसरत थांबणार असल्याचे शेतकऱ्यांकडून समाधान व्यक्त होत आहे.

वर्षानुवर्षे होणारे हाल थांबणार

लॉकडाउनमध्ये लाखो रुपये खर्च करून शेतकऱ्यांनी रस्ता बनविला. या रस्त्यामुळे शेतकऱ्यांची वर्षानुवर्षे होणारे हाल थांबणार आहेत. निमोणच्या पूर्वेला शेतशिवारात दाट लोकवस्ती आहे. यात देवरे, गांगुर्डे, अहिरे, दखणे आदी शंभरावर शेतकरी आहेत. मात्र, दर वर्षी शेतकऱ्यांना पावसाळ्यात गावातून शेतीत जाणे किंवा शेतमाल नेण्यासाठी कसरत करावी लागत होती. निमोणपासून कुंदलगाव शिवापर्यंत दीड-दोन किलोमीटरच्या रस्त्यावर शेतकरी वर्षानुवर्षे त्रास सहन करीत होते. बोडके वस्तीपासून पुंजाराम देवरे यांच्या घरापर्यंत हा रस्ता खूपच खराब होता. हा रस्ता करावा, अशी मागणी शेतकऱ्यांनी केली. मात्र, पदरी निराशा पडत असल्याने सर्व शेतकऱ्यांनी एकत्र येत स्वखर्चाने रस्ता बनविण्याचे ठरविले. एकत्र येत दीड किलोमीटरचा रस्ता तयार केला. जेसीबी, ट्रॅक्‍टरच्या सहाय्याने खडी, मुरूम वाहून रस्ता बनविला. यासाठी काही शेतकऱ्यांनी शेतातील विहिरीचा भराव दिला. रवींद्र दखणे यांनी शेतात पाणी साठविण्यासाठी मोठा खड्डा तयार करून त्यातील मुरूम रस्त्यासाठी दिला. 

हेही वाचा > काय सांगू गोदा तुझी कथा...कशी अन् किती सांगणार व्यथा!

रस्त्यासाठी चार ते पाच दिवस शेतकऱ्यांनी स्वतः विनामोबदला काम केले. त्यात विलास देवरे, साहेबराव देवरे, राजाराम देवरे, वाल्मीक देवरे, संजय देवरे, दत्तू देवरे, यादव देवरे, भास्कर देवरे, उत्तम देवरे, तुकाराम देवरे, शशी गवारे, उत्तम गवारे, धर्मा गांगुर्डे, भारत अहिरे, किरण गांगुर्डे, गटलू देवरे, रतन देवरे, रवींद्र दखणे, मधुकर दखणे, सुनील दखणे, भास्कर दखणे, रमेश दखणे व इतर शेतकऱ्यांनी योगदान दिले. या रस्त्यामुळे शेतकऱ्यांचे हाल थांबणार असल्याने त्यांनी समाधान व्यक्त केले. 

हेही वाचा > आजी-आजोबांची भेट.. अवघड वळणाचा घाट.. जणू वाट बघत होता तिघांचा काळ