ह्रदयद्रावक! हलाखीची परिस्थिती..अशात दैवाने हिरावला 'त्यांचा' मुलगा..

नाशिक : सिन्नर महाविद्यालयासमोर दुचाकी व महाविद्यालयात वळणाऱ्या प्राध्यापकाच्या कारची जोरदार धडक झाली. या अपघातात तरुण ठार झाला. ही घटना बुधवारी (ता. 19) सकाळी सात वाजून 20 मिनिटांनी घडली. 

अशी घडली घटना...

अजय ताल्ला (वय 23, रा. अपना गॅरेजवळ) व अविनाश अंबादास दुसा (23, रा. पडकी वेस, तानाजी चौक) हे दोघे दुचाकीवरून माळेगाव औद्योगिक वसाहतीतील नोबेल हायजीन कंपनीत कामावर जात होते. महाविद्यालयाजवळ प्रा. नितीन जाधव (37) कारने (एमएच 15, ईपी 5438) महाविद्यालयाच्या गेटकडे वळत होते. याच वेळी कार व दुचाकीची जोरात धडक झाली. यात दुचाकीवर मागे बसलेला अविनाश रस्त्यावर पडला. त्याच्या डोक्‍याला गंभीर मार लागला रक्तस्त्राव झाल्याने तो जागीच ठार झाला, तर अजय जखमी झाला.

हेही वाचा > ज्या आईच्या उदरातून जन्म घेतला, त्यावरच 'त्याने' घाव घातला...

कुटुंबाची परिस्थिती अत्यंत हलाखीची

अविनाशच्या कुटुंबाची परिस्थिती अत्यंत हलाखीची आहे. त्याचे वडील शहरातील हॉटेलमध्ये कामगार आहेत. आई विडी कामगार आहे. मोठा भाऊ व विवाहित बहीण आहे. कुटुंबाला हातभार लागावा, म्हणून तो मिळेल ते काम करत होता. माळेगाव येथील नोबेल हायजीन कंपनीत तो रोजंदारीवर कामाला होता. बुधवारी नेहमीप्रमाणे कामावर जात असताना, काळाने त्याच्यावर घाला घातला. त्यांच्या अपघाती मृत्यूमुळे कुटुंबावर आकाश कोसळले. पद्मशाली समाजाचा तो अत्यंत क्रियाशील युवा कार्यकर्ता होता. याप्रकरणी पोलिसांनी अपघाताचा गुन्हा दाखल केला. 

हेही वाचा > सुनेला वाचविण्यासाठी 'ते' पुढे सरसावले!...तर मुलाने त्यांनाच