काय सांगता! ही एसटी धावते फक्त अमावस्या आणि पौर्णिमेलाच; भाविकांची अतूट श्रध्दा

नाशिक : एसटी महामंडळ आपल्या ग्राहकांना आकर्षित करण्यासाठी तसेच उत्पन्न वाढीसाठी नेहमीच वेगवेगळ्या योजना आणत असते. पण कदाचित तुम्हाला ऐकून आश्चर्य वाटेल पण एक एसटी बस अशी आहे. जी फक्त अमावस्या आणि पौर्णिमेलाच धावते. काय आहे नेमके यामागचे रहस्य?

ही एसटी फक्त अमावस्या आणि पौर्णिमेलाच धावते.
नाशिकमधून एक बस सुरू झाली. अनेक वर्षांपासून अविरत ही बस फक्त अमावस्या अथवा पौर्णिमेलाच भाविकांसाठी उपलब्ध असते. याची माहिती विचारली असता एसटी महामंडळाकडून सांगण्यात आले कि,  उत्पन्न वाढ आणि प्रवाशांची माागणी याचा ताळमेळ घालून या विशेष सेवा दिल्या जातात. अमावस्या आणि पौर्णिमेनिमित्त सुरू झालेली बस सेवा अनेक वर्षांपासून अविरत सुरू आहेत.

हेही वाचा > सिनेस्टाइल पाठलाग! खंडणीची मागणी करणारा पोलीसांकडून ट्रेस; पोलिसांत गुन्हा दाखल

कमी पैशांत, वेळेत पोहचवण्याचे कार्य

विशेष म्हणजे यासाठी भाविकांची मोठी गर्दी होत असते. महानुभाव पंथीयांमध्ये जाळीचा देव आणि पंचाळेश्वर या धार्मिक ठिकाणांचे मोठे महत्व आहे. बुलढाण्याजवळील श्रीक्षेत्र जाळीचा देव आणि नेवासा तालुक्यातील (जि. नगर) पंचाळेश्वर येथे भाविकांना कमीत कमी पैशांत, वेळेत पोहचवण्याचे कार्य एसटी महामंडळ करते. 

हेही वाचा > हॉटेल मालकाने बळजबरीने ग्राहकाकडून घेतला ८० हजारांचा ऐवज; मालकावर गुन्हा दाखल

एसटीकडून श्रध्देला व धार्मिकतेला महत्व

एसटी महामंडळाच्या या सेवेमुळे प्रवाश्यामध्ये देखील आनंद व समाधानाचे वातावरण आहे. भाविक या सेवेबाबत भरभरून सांगतात कि, कमी पैसे, सुरक्षितता यामुळे कुटुंबीय सहजतेने प्रवास करू शकतात. अमावस्या आणि पौर्णिमेचे महत्त्व असल्याने याच दिवशी पहाटेच्या सुमारास सीबीएस येथून बस सुटते. एकदा जाळीचा देव तर एकदा पंचाळेश्वर अशी ही बस सेवा उपलब्ध असते. जाळीचा देव येथे जाणारी बस श्री चक्रधरस्वामींनी ज्या भागातून प्रवास केला त्या ठिकाणांना भेटी देत जाते, असे त्यांनी स्पष्ट केले. श्री क्षेत्र जाळीचा देव येथे श्री चक्रधरस्वामी यांनी मुक्काम केला होता. तर, पंचाळेश्वर येथे श्री दत्तात्रय जेवणासाठी येतात, अशी त्यांची श्रद्धा आहे. जिल्ह्यात महानुभव पंथीयांची संख्या मोठी आहे. एसटी बस नियमित अमावस्या आणि पौर्णिमेला उपलब्ध होते. नाशिक ते जाळीचा देव अथवा पंचाळेश्वर येथील दर्शनानंतर पुन्हा नाशिकला पोहचता येते. लॉकडाउनचा अपवाद वगळता ही बस सेवा नियमित असते.

अष्टविनायक दर्शन करायचे तर चला एसटीने!

धार्मिक स्थळांचे महत्व लक्षात घेता एसटी महामंडळाने नाशिक, वेरूळ, भद्रामारुती आणि पुन्हा नाशिक अशी सेवा ही सेवा सुरू केली. आता नाशिक विभागाने दर संकष्ट चतुर्थीला अष्टविनायक दर्शन सेवा सुरू केली आहे. नाशिकच्या नवीन बस स्थानक येथून संकष्ट चतुर्थीच्या दिवशी सकाळी आठ वाजता ही बस सुटते. तर, तिसऱ्या दिवशी सायंकाळी सहा वाजता ही बस पुन्हा नाशिकला परतते. ओझर, लेण्याद्री, थेऊर, सिद्धटेक, मोरगाव, राजंणगाव, महड, पाली आणि नाशिक असा या बसचा मार्ग असतो. यासाठी संगणकीय आरक्षण प्रणाली उपलब्ध असून, प्रवाशांनी NSKCBS TO ASTVNYKDRS या सांकेतिक कोडचा वापर करावा, असे एसटी महामंडळाकडून स्पष्ट करण्यात आले आहे.