Dhule News : चाळीसगाव चौफुलीवर ‘ट्रॅफिक’ला दिलासा; उड्डाणपुलास मंजुरी!

धुळे : शहरालगत महामार्गाचे चौपदरीकरण होऊनही चाळीसगाव चौफुलीवर रोजच उद्‌भवणाऱ्या ट्रॅफिक जॅममुळे वाहनधारक कमालीचे त्रस्त असतात. त्याकडे कुठल्याही लोकप्रतिनिधींचे फारसे लक्ष नव्हते. (78 crore sanctioned for flyover at Chalisgaon Chaufuli dhule news)

या स्थितीत आमदार फारूक शाह यांनी हा प्रश्‍न हाताळत केंद्रीय रस्ते व परिवहनमंत्री नितीन गडकरी यांच्याकडे पाठपुरावा सुरू केला. यानंतर त्यांनी उड्डाणपुलास हिरवा कंदील देत ७८ कोटींचा निधी मंजूर केल्याची माहिती आमदार शाह यांनी दिली.

चाळीसगाव चौफुलीवर रोज तासन‍तास होणाऱ्या ट्रॅफिक जॅममुळे वाहनधारक वैतागले आहेत. हा प्रश्‍न कोण, कधी सोडवेल याची त्यांना प्रतीक्षा होती. हा गंभीर प्रश्‍न हाताळत आमदार शाह यांनी चाळीसगाव चौफुलीवर वेळोवेळी ठिय्या आंदोलन करत प्रशासन आणि केंद्र, राज्य शासनाचे लक्ष वेधले.

तसेच उड्डाणपुलाच्या मंजुरीसाठी निवेदने दिली. त्यांच्या पाठपुराव्याला प्रतिसाद देत केंद्रीय रस्ते व परिवहनमंत्री नितीन गडकरी यांनी चाळीसगाव चौफुली येथे उड्डाणपुलासाठी ७८ कोटींचा निधी मंजूर केला आहे. याबाबत वाहनधारकांतर्फे आमदार शाह यांनी मंत्री गडकरी यांचे आभार मानले आहेत.

हेही वाचा : जीएसटीसाठी नोंदणी केलीच नाही तर??

धुळे शहरालगत मुंबई-आग्रा आणि धुळे ते सोलापूर महामार्ग व्हाया चाळीसगाव जातो. हे दिवसरात्र अतिवर्दळीचे महामार्ग आहेत. तरीही चाळीसगाव चौफुलीवर सिग्नल यंत्रणा बंद असते. दिवसभरातील ट्रॅफिक जॅममुळे नियमित चालणारे वादविवाद, अनेक लहान-मोठे अपघात, प्रसंगी त्यातून निर्माण होणारा तणाव आदी घटनांना प्रशासनाला सामोरे जावे लागते.

तसेच सुलतानिया मदरशाजवळ सर्व्हिस रोड, पथदीप, गटारी नाहीत. पथदीप नसल्याने तेथे कोरोनाच्या संकटकाळातील लॉकडाउनमध्ये खुनाची घटना, चोऱ्यामाऱ्या, लूटमार, अपघात यांसारख्या अनुचित घटनांमुळे शहराच्या प्रतिमेस धक्काही लागत असतो. तशा तक्रारी वेळोवेळी राष्ट्रीय महामार्ग प्राधिकरणाचे प्रकल्प संचालक भाऊसाहेब साळुंखे आणि व्यवस्थापक संजय गुरव यांच्याकडे आमदार शाह यांनी पत्राद्वारे केली. तसेच केंद्रीय मंत्री गडकरी यांच्याकडे उड्डाणपुलाची मागणी केली.

ट्रॅफिक जॅमचा प्रश्‍न सुटणार

याप्रश्‍नी दोन महिन्यांपूर्वी उड्डाणपूल होण्यासाठी चाळीसगाव चौफुलीवर आंदोलनही झाले होते. त्याची दखल घेत मंत्री गडकरी यांनी निधी उपलब्धतेतून हा प्रश्‍न मार्गी लावला आहे. महामार्ग प्राधिकरणाने चाळीसगाव चौफुली येथे उड्डाणपूल होणार असल्याचे पत्रात नमूद केले आहे. लवकरच काम सुरू होणार असल्याने चाळीसगाव चौफुलीवरील ट्रॅफिक जॅमचा प्रश्‍न सुटून वाहनधारकांना दिलासा मिळेल.