भाजप नगरसेवक शेट्टीविरोधात तडीपारीचा प्रस्ताव

नाशिक - ज्वाल्या खून प्रकरणाचा मुख्य सूत्रधार व भाजपचे नगरसेवक हेमंत शेट्टी आणि वाघ खून प्रकरणातील संशयित अजय बागूल यांच्यासह पंचवटीतील 21 सराईत गुन्हेगारांविरोधात तडीपारीचा प्रस्ताव तयार करण्यात आला आहे. त्यावर लवकर शिक्कामोर्तब होण्याची शक्‍यता आहे. शेट्टीप्रमाणे बागूल हे भाजपशी संबंधित आहेत. गंभीर गुन्हे दाखल असलेले पण राजकारणात "व्हाइट कॉलर' होऊ पाहणाऱ्यांच्या गुन्हेगारी कुंडल्या पुन्हा उचकल्या जात असून, त्यांच्याविरोधात पोलिसांकडून तडीपारीचे प्रस्ताव होत आहेत.

पंचवटीतील सराईत गुन्हेगार ज्वाल्या ऊर्फ जालिंदर उगलमुगले याचा 2015 मध्ये हेमंत शेट्टीने राकेश कोष्टी, कुंदन परदेशी, अविनाश कौलकर यांच्यासह साथीदारांच्या मदतीने इगतपुरीच्या जंगलात खून केला होता. दोन ते अडीच वर्षांनंतर या खुनाची उकल झाली. याप्रकरणी हेमंत शेट्टीला पंचवटी पोलिसांनी अटक केली होती. सध्या उच्च न्यायालयाच्या आदेशानुसार जामिनावर असलेल्या शेट्टी विरोधात पंचवटी पोलिसांनी तडीपारीचा प्रस्ताव मंजुरीसाठी पोलिस उपायुक्तांकडे सादर केला आहे.