Nandurbar Crime News : कुख्यात गुन्हेगार वर्षभरासाठी नंदुरबार जिल्ह्यातून हद्दपार

Nandurbar Crime News : आगामी सण/उत्सवाच्या अनुषंगाने जिल्ह्यात कायदा व सुव्यवस्थेसाठी बाधा ठरणारे तसेच मालमत्ता व शरीराविरुद्धचे गुन्हे करणाऱ्या व्यक्तींची माहिती घेऊन त्यांच्यावर दाखल गुन्ह्यांचा आढावा घेतला असता अक्कलकुवा पोलिस ठाणे हद्दीतील मोहसीन रफीक मक्राणी (रा.मक्राणीफळी, अक्कलकुवा) यास एक वर्षासाठी जिल्ह्यातून हद्दपार करण्याचे आदेश पोलिस प्रशासनाने दिले. (criminals exiled from Nandurbar district for year nandurbar crime news)

जिल्हा पोलिस अधीक्षक पी. आर. पाटील यांनी घेतलेल्या आढावा बैठकीत मोहसीन रफीक मक्राणी दहशत व वचक ठेवण्यासाठी नियमितपणे गुन्हे करत असल्याचे निदर्शनास आले.

त्याच्यापासून सामान्य नागरिकांच्या मालमत्तेस व जीवीवितास धोका निर्माण झालेला असून, त्याच्यावर वेळोवेळी प्रतिबंधक कारवाई करूनदेखील त्याच्या वर्तनात सुधारणा झालेली नाही, म्हणून पोलिस अधीक्षकांनी मक्राणीवर कठोर प्रतिबंधक कारवाईसाठी अक्कलकुवा पोलिस ठाण्याचे निरीक्षक दीपक बुधवंत यांना आदेशित केले होते.

त्याला दोन वर्षे कालावधीसाठी नंदुरबार जिल्ह्यातून हद्दपार करण्याचा प्रस्ताव तळोदा उपविभागीय दंडाधिकारीमंदार पत्की यांच्या कार्यालयात पाठविण्यात आला होता.

त्यानुसार यास एक वर्ष कालावधीसाठी हद्दपार करण्याचे आदेश मंगळवारी (ता. ७) दिले.