Dhule News : कृषिकन्यांकडून जनावरांचे लसीकरण

Dhule News : दोंडाईचा (ता. शिंदखेडा) येथील विकासरत्न सरकारसाहेब रावल कृषी महाविद्यालयाच्या विद्यार्थिनींनी सोनशेलू गावात जनावरांची लसीकरण मोहीम राबविली. या मोहिमेत त्यांनी गावातील शेकडो जनावरांचे लाळखुरकत आजार प्रतिबंध (एफएमडी) लसीकरण केले.

कृषी महाविद्यालयाच्या विद्यार्थिनी ग्रामीण कृषी कार्यानुभव कार्यक्रमानिमित्त सोनशेलू गावात गेल्या. (animal vaccination campaign)

त्यांनी महाविद्यालयाचे संस्थापक सरकारसाहेब रावल, शिंदखेड्याचे आमदार जयकुमार रावल, महाविद्यालयाचे प्राचार्य रूपसिंग बी. राजपूत यांच्या मार्गदर्शनाखाली गावातील जनावरांच्या आरोग्याबाबत ग्रामस्थांशी चर्चा केली.

त्यानंतर पशुवैद्यकीय विभागाच्या डॉ. एस. एस. शिंदे, डॉ. एस. बी. पुपळवाड यांच्या मार्गदर्शनाखाली एफएमडी लसीकरण मोहीम राबविली. यासाठी त्यांना डॉ. पी. एम. चव्हाण, डॉ. राहुल गिरासे, डॉ. अतुल माळी, डॉ. भटू सोनवणे यांनी सहकार्य केले. (latest marathi news)

मोहिमेत कृषिकन्यांनी सोनशेलू गावातील ४० बैल, २३ गायी, २० वासरे, २४ म्हशी आदी जनावरांचे लसीकरण केले. तसेच दोन गायींची गर्भ तपासणी केली. मोहिमेत कृषी महाविद्यालयाच्या विद्यार्थिनी विशाखा विलास बोडके, भाग्यश्री घरटे, विशाखा गावित, रितिका गिरासे, वैष्णवी पवार, महेश्वरी पिंपळे, साक्षी रौंदळ यांचा सहभाग होता.

सरपंच प्रियांका बडगुजर, धीरज बडगुजर, दिलीपसिंग गिरासे, हरसिंग गिरासे यांच्यासह ग्रामस्थ उपस्थित होते. मोहिमेबद्दल सरकारसाहेब रावल, आमदार जयकुमार रावल, प्राचार्य राजपूत यांनी विद्यार्थिनींचे कौतुक केले.