बेपत्ता प्रौढाची जंगलात आत्महत्या

धुळे : शहरातून बेपत्ता व्यक्तीचा गळफास घेतलेल्या स्थितीतील मृतदेह रविवारी (ता.२९) पुरमेपाडा (ता.धुळे) शिवारातील जंगलात आढळला. संभाजी कचरू सुतार (वय ५४, रा. स्वामी नारायण कॉलनी, दाता सरकार मंगल कार्यालयामागे, धुळे) असे त्यांचे नाव आहे. या प्रकरणी धुळे तालुका पोलिस ठाण्यात नोंद झाली.

संभाजी सुतार २७ मेस सकाळी पावणेआठच्या सुमारास कटिंग करून येतो, असे घरातील सदस्यांना सांगत दुचाकीने (क्रमांक : एमएच १८ बीएस १७८३) निघाले. सायंकाळपर्यंत ते परत न आल्याने कुटुंबीयांनी आझादनगर पोलिस ठाण्यात हरविल्याची माहिती दिली. तालुका पोलिसांनी रविवारी दुपारी साडेतीनला सुतार कुटुंबीयांशी संपर्क साधला. पुरमेपाडा (ता. धुळे) शिवारातील जंगलात दुचाकी उभी आहे. लगतच्या झाडाला एक व्यक्ती गळफास घेतलेल्या स्थितीत असल्याची माहिती दिली. नातेवाइकांनी घटनास्थळी धाव घेतली असता ते संभाजी सुतार असल्याचे आढळले. झाडाच्या उंचावर गळफास घेतलेल्या स्थितीत मृतदेह आढळल्याने मृतदेह उतरवणे जिकरीचे झाले होते. जेसीबीच्या मदतीने उंच फांदी खाली करून मृतदेह उतरवण्यात आला. त्यासाठी ग्रामस्थांनी मदत केली. सुतार यांच्या आत्महत्येमागील कारण समजले नाही.