झुलत्या पुलावर टवाळखोरांचा उच्छाद

धुळे : शहरातील गणपती मंदिराजवळील पांझरा नदीत झुलत्या पुलाची उभारणी करण्यात आली आहे. याठिकाणी श्री भगवान महादेवाची मूर्ती स्थापन करण्यात आली आहे. धार्मिक आणि प्रेक्षणीय स्थळ असल्याने काही महिला, तरुणी तसेच बालक येथे येतात. मात्र, आता त्याचा गैरफायदा टवाळखोर घेत आहेत. टवाळखोरांनी उच्छाद मांडला असून, ते महिला व तरुणींची छेड काढतात. त्यामुळे येथील पावित्र्य नष्ट होत आहे. (dhule-maratha-mahasangh-later-mayor-zulta-bridge)

या पार्श्वभूमीवर सीसीटीव्ही लावून सुरक्षारक्षक नेमावेत, अशी मागणी मराठा महासंघाने महापौर चंद्रकांत सोनार यांच्याकडे निवेदनाद्वारे केली. मराठा महासंघाचे जिल्हाध्यक्ष जगन ताकटे, शहराध्यक्ष विक्रमसिंह काळे, धुळे तालुकाध्यक्ष रमेश मराठे, बाजीराव खैरनार, कांतिलाल देवरे, मिलिंद पाटील, पवन शिंदे, आशिष देशमुख, सुरेश सूर्यवंशी, सुनील ठाणगे, सतीश गिरमकर, संजय नेतकर, राजेंद्र मराठे, उमेश पवार, साहेबराव पाटील यांच्या निवेदनाचा आशय असा ः पांझरा नदीवरील झुलत्या पुलावर श्री भगवान महादेव मूर्तीचे पावित्र्य राखणे आवश्यक आहे. येथे सर्वधर्मीय भाविक येतात. मात्र, त्या ठिकाणी टवाळखोरांचा त्रास वाढला आहे. ते पान, गुटखा खाऊन तेथेच थुंकतात व घाण करतात. तसेच मुलींची छेड काढणे, अश्लील शब्द वापरून तेथील वातावरण बिघडविण्याचे प्रकार घडत आहेत. हे प्रकार रोखण्यासाठी तेथे सीसीटीव्ही कॅमेरे बसविण्यात यावेत. कोणी धूम्रपान करू नये, असे फलकही लावणे आवश्यक आहे. सुरक्षारक्षकांची नियुक्ती करून टवाळखोरांचा बंदोबस्त करावा. याबरोबरच पुलाखाली उघड्यावर शौचास बसणाऱ्यांवर दंडात्मक कारवाई करावी, अशी मागणी होत आहे.