Nandurbar Crime News : बालिकेचा विनयभंग प्रकरणी आरोपीस; 12 वर्षे एक महिना कारावासाची शिक्षा

Nandurbar Crime News : अल्पवयीन मुलीचा विनयभंग करणाऱ्या आरोपीस शहादा येथील अतिरिक्त सत्र न्यायालयाने शनिवारी बारा वर्षे व एक महिना कारावासाची आणि चार हजार रुपये दंडाची शिक्षा सुनावली आहे. धडगाव पोलिस ठाणे हद्दीत राहणाऱ्या अल्पवयीन पिडीतेस आरोपी पंकज आमदा पावरा (वय ३२, रा. बोरवण ता.धडगाव जि. नंदुरबार) याने वेळोवेळी पाठलाग करीत १४ ऑगस्ट २०१८ रोजी सकाळी विहिरीवरून पाणी घेऊन येत असताना तिचा विनयभंग केला होता. (Nandurbar Crime)

याप्रकरणी आरोपी पंकज याच्याविरुद्ध धडगाव पोलिस ठाणे येथे गुन्हा नोंदविला होता. गुन्हा गंभीर स्वरूपाचा असल्याने आरोपीस पोलिसांनी तत्काळ अटक केली होती. पोलिस उपनिरीक्षक एस.व्ही.दहिफळे यांनी या गुन्ह्याचा तपास केला. श्री. दहिफळे यांनी सखोल तपास करीत महत्त्वाचे पुरावे जमा केले होते. तसेच गुन्हा दाखल झाल्यानंतर आरोपी याचे विरुद्ध मुदतीत दोषारोपपत्र न्यायालयात सादर केले होते.

सदर खटल्याची सुनावणी अतिरिक्त सत्र न्यायाधीश, सी.एस.दातीर यांचे समक्ष झाली. सदर खटल्यामध्ये सरकार पक्षाचे वतीने साक्षीदार तपासण्यात आले. त्यात पीडित युवती, प्रत्यक्षदर्शी साक्षीदार, पीडित बालिकेचे पालक, वैद्यकीय अधिकारी, पंच व तपास अधिकारी यांच्या साक्ष महत्त्वाच्या ठरल्या आहेत.

यावरुन आरोपी विरुद्ध गुन्हा सिद्ध झाल्याने अति. सत्र न्यायाधीश, शहादा यांनी आरोपी पंकज पावरा यास १२ वर्ष एक महिना कारावासाची व चार हजार रुपये दंडाची शिक्षा ठोठावली.

सरकारी पक्षाच्यावतीने अतिरिक्त सरकारी अभियोक्ता वाय.बी.मोरे यांनी काम पाहिले होते. पैरवी अधिकारी म्हणून पोलिस उपनिरीक्षक सागर नांद्रे, परशुराम कोकणी देविदास सूर्यवंशी यांनी कामकाज पाहिले आहे.