Nandurbar Crime : तीनटेंबा येथील शेतात मद्यसाठा पकडला! 3 लाख 18 हजारांचा मुद्देमाल हस्तगत; नवापूर पोलिस ठाण्यात गुन्हा

नवापूर : पोलिसांनी गुरुवारी (ता. ६) दुपारी साडेबाराच्या सुमारास आमलीफळीच्या तीनटेंबा (ता. नवापूर) येथील शेतात लपवून ठेवलेला अवैध मद्यसाठा पकडला. तीन लाख १८ हजारांच्या मुद्देमालासह तीन संशयितांना ताब्यात घेऊन नवापूर पोलिस ठाण्यात गुन्हा दाखल करण्यात आला. (Nandurbar Crime Liquor stock caught in Tintemba)

नवापूर पोलिसांना गुरुवारी मिळालेल्या माहितीनुसार तालुक्यातील आमलीफळी व तीनटेंबा येथे हरीश मावची याच्या शेतातील झोपडीत अवैधरीत्या ठेवलेला देशी दारूचा साठा गुजरातमध्ये विक्रीकरिता घेऊन जाणार असल्याची खात्रीशीर बातमी मिळाली होती.

नवापूर पोलिस पथकाने दुपारी साडेबाराच्या सुमारास छापा टाकून पाहणी केली. यात दोन मोटारसायकलींसह मेहुल राकेश नायका (रा. तीनटेंबा, ता. नवापूर), अतुल मुंगा गामित (रा. पटेल फळिया, उच्छल, गुजरात) हे संशयित मिळून आले. त्यांना विचारपूस करून शेतातील झोपडीची झडती घेतली असता झोपडीत देशी दारूचे पन्नास बॉक्स मिळून आले. (latest marathi news)

या बॉक्सबाबत त्यांच्याकडे विचारपूस केली असता मुद्देमाल आम्ही दोघे व आकाश मावची (रा. आमलीफळी, तीनतेंबा, ता नवापूर) व सुरेंद्र ऊर्फ सुंदर यांनी मिळून आणला आहे, असे त्यांनी सांगितले. त्यानुसार नवापूर पोलिस ठाण्यात महाराष्ट्र दारूबंदी अधिनियम कलमांन्वये गुन्हा दाखल करण्यात आला. या गुन्ह्यात तीन लाख १८ हजारांचा मुद्देमाल जप्त करण्यात आला.

ही कारवाई पोलिस अधीक्षक श्रवण दत्त एस., अपर पोलिस अधीक्षक नीलेश तांबे, उपविभागीय पोलिस अधिकारी संजय महाजन यांच्या मार्गदर्शनाखाली नवापूर पोलिस ठाण्याचे प्रभारी सहाय्यक पोलिस निरीक्षक नरेंद्र साबळे, पोलिस उपनिरीक्षक मनोज पाटील, भाऊसाहेब लांडगे, हवालदार दादाभाई वाघ, दिनेश वसुले, पोलिस नाईक प्रेमचंद जाधव, पोलिस रणजित महाले, किशोर वळवी यांच्या पथकाने केली.