Nashik News : चुंचाळे शिवारातील 10 भंगारची दुकाने आगीत खाक

सिडको (जि. नाशिक) : चुंचाळे शिवारातील घरकुल योजनेजवळील भंगार दुकानाला शुक्रवारी (ता. २४) पहाटे तीनच्या सुमारास भीषण आग लागली. आगीने काही वेळातच रौद्ररूप धारण केले होते. (10 scrap shops in Chunchale Shiwar gutted in fire Nashik News)

हेही वाचा : ..ही काळजी घ्या नाहीतर खिसा होईल साफ!

आगीमुळे धुराचे मोठे, मोठे लोट दिसत असल्याने परिसरातील नागरिकांमध्ये भीतीचे वातावरण निर्माण झाले होते. आगीमुळे सिलिंडरच्या स्फोटासारखा आवाज झाल्याची माहिती स्थानिकांनी दिली असून आगीत नऊ ते दहा दुकाने जळून खाक झाली आहेत.

सुदैवाने या आगीत कोणतेही जीवितहानी झाली नसली तरी मोठे आर्थिक नुकसान झाले आहे. या अग्नितांडवाचा फटका कचरा वेचून गुजराण करणाऱ्या गरीब कुटुंबांना ही बसला असून, सर्वांचे संसार उघड्यावर आले आहेत.

आगीची माहिती मिळताच नवीन नाशिक, सातपूर, अंबड औद्योगिक वसाहतीतील अग्निशमन दलाच्या गाड्या घटनास्थळी पोचल्या. भंगारात रबर, टायर व प्लॅस्टिकचा समावेश मोठ्या प्रमाणावर आहे.

या परिसरात भंगाराचे २५ ते ३० दुकाने आहेत. त्यातील ९ दुकानांना ही आग लागली होती. आग लागल्याची माहिती मिळताच अंबड पोलिसदेखील घटनास्थळी दाखल झाले. मात्र, रात्री उशिरा ही आग कशामुळे लागली याचे कारण समजू शकले नाही.