Corona Update : जिल्‍ह्यात 188 कोरोनामुक्‍त; 86 पॉझिटिव्‍ह

नाशिक : बऱ्याच दिवसांनंतर जिल्‍ह्यात नव्‍याने आढळलेल्‍या कोरोनाबाधितांच्‍या (Corona Patients) तुलनेत कोरोनामुक्‍त रुग्‍णांची संख्या अधिक राहिली.

सोमवारी (ता. १८) जिल्‍ह्यात ८६ रुग्‍णांचे कोरोनाचे अहवाल पॉझिटिव्‍ह आले, तर १८८ रुग्‍णांनी कोरोनावर यशस्‍वी मात केली. यातून ॲक्‍टिव्‍ह रुग्‍णसंख्येत १०२ ने घट झाली. सद्यःस्‍थितीत उपचार घेणाऱ्या बाधितांची संख्या ६०७ झाली आहे. (188 corona free in district 86 positive nashik Corona Update latest marathi news)

गेल्‍या काही दिवसांपासून दैनंदिन कोरोनाबाधितांची संख्या कोरोनामुक्‍त रुग्‍णांपेक्षा अधिक राहत होती. यामुळे जिल्‍ह्यातील सक्रिय बाधितांची संख्या सातशेपार पोचली होती. नव्‍याने आढळणाऱ्या बाधितांची संख्या शंभरीच्‍या जवळ असली, तरी सोमवारी मोठ्या प्रमाणावर रुग्‍णांनी कोरोनावर यशस्‍वी मात केली.

दिवसभरात ८६ पॉझिटिव्‍ह आढळले. यांपैकी नाशिक महापालिका क्षेत्रातील ३४, नाशिक ग्रामीण क्षेत्रातील ४९, मालेगाव महापालिका क्षेत्रातील एक, तर जिल्ह्याबाहेरील दोघांना कोरोनाची लागण झाल्‍याचे निदान झाले. १८८ रुग्‍णांनी कोरोनावर यशस्‍वी मात केली.

सध्या उपचार घेत असलेल्‍या ६०७ कोरोनाबाधितांमध्ये नाशिक महापालिका क्षेत्रातील २८९, नाशिक ग्रामीण क्षेत्रातील २८४ बाधितांचा समावेश आहे. मालेगाव महापालिका क्षेत्रात १९, जिल्‍ह्याबाहेरील १४ बाधितांवर उपचार सुरू आहेत.

सोमवारी जिल्‍ह्याचा पॉझिटिव्‍हिटी दर ५.१२ टक्‍के राहिला. नाशिक महापालिका क्षेत्रासाठी ६.९४ टक्‍के, तर नाशिक ग्रामीणसाठी ४.१८ टक्‍के होता. सायंकाळी उशिरापर्यंत एक हजार ६६ अहवाल प्रलंबित होते. नाशिक ग्रामीणमधील ८०२, नाशिक शहरातील दीडशे, तर मालेगावच्‍या ११४ रुग्‍णांना अहवालाची प्रतीक्षा होती.