NMC हद्दीत 2 लाख तिरंगा ध्वज विक्री

नाशिक : देशाला स्वातंत्र्य मिळून ७५ वर्ष झाल्याने त्यानिमित्त केंद्र सरकारकडून आजादी का अमृत महोत्सव उपक्रम राबविला जात आहे. या उपक्रमांतर्गत हर घर झेंडा या मोहिमेचा समावेश आहे. नाशिक महापालिकेने मोहिमेअंतर्गत दोन लाख तिरंगा ध्वज विक्री करण्याचा निर्णय घेतला आहे. (2 lakh indian flag sale in NMC limits nashik Latest Marathi News)

स्वातंत्र्याच्या अमृत महोत्सवानिमित्त क्रांतिकारकांचे स्मरण होण्याच्या दृष्टीने हर घर झेंडा उपक्रम राबविला जात आहे. १३ ते १५ ऑगस्ट या कालावधीमध्ये हा उपक्रम राबविला जाईल. शहर व जिल्ह्यात ३८ लाख ५१ हजार ६५१ येथे घरांची संख्या आहे.

या प्रत्येक घरावर झेंडा फडकविण्याचे नियोजन विभागीय महसूल आयुक्त कार्यालयाच्या माध्यमातून केले जात आहे. नाशिक महापालिका हद्दीमध्ये दोन लाख तिरंगा ध्वजाची मागणी नोंदविण्यात आली आहे.

अहमदाबाद येथून महापालिकेला ध्वज प्राप्त होईल. नागरिकांना ध्वज उपलब्ध व्हावा यासाठी सिडको ,सातपूर, पूर्व, पश्चिम, पंचवटी व नाशिक रोड या सहा विभागीय कार्यालयात ध्वज विक्रीची व्यवस्था करण्यात आली आहे. नागरिकांना ३० इंच रुंद व वीस इंच लांबीचा झेंडा खरेदी करण्यासाठी २१ रुपये शुल्क अदा करावे लागणार आहे.