झाडावरून पडल्याने तरुणाचा मृत्यू

सिन्नर (जि. नाशिक) : सुळेवाडी येथील तरुण जांभूळ तोडण्यासाठी झाडावर चढलेला असताना तोल जाऊन खाली पडल्याने त्याचा मृत्यू झाला. मंगळवारी (ता.१४) दुपारी तीनच्या सुमारास ही घटना घडली.

अमित सोमनाथ जाधव (२६) असे मृत तरुणाचे नाव आहे. या तरुणाचा मृत्यू झाल्याचे समजताच संपूर्ण सुळेवाडी गावावर शोककळा पसरली. पोलिसांनी सांगितले की सुळेवाडी येथे अमीत जाधव हा तरुण जांभूळ तोडण्यासाठी झाडावर चढला. जांभूळ तोडत असताना त्याचा तोल जावून तो खाली पडला व गंभीर जखमी झाला.

कुटूंबियांनी त्याला तात्काळ उपचारार्थ सिन्नर ग्रामीण उपजिल्हा रुग्णालयात दाखल केले, तथापि उपचारांपूर्वीच त्याची प्राणज्योत मालवली. घटनेची माहिती पोलिसांना मिळल्यानंतर पंचनामा करण्यात आला. ग्रामीण उपजिल्हा रुग्णालयात शवविच्छेदन केल्यानंतर मृतदेह नातेवाईकांच्या ताब्यात देण्यात आला. एमआयडीसी पोलिस ठाण्यात आकस्मात मृत्यूची नोंद करण्यात आली. हवालदार बागूल तपास करीत आहेत.