नाशिक : शेवगा लागवड योजनेतंर्गत प्रतिहेक्टरी ३० हजार अनुदान

नाशिक : राष्ट्रीय पशुधन अभियान (अनुसूचित जाती उपयोजना) अंतर्गत अनुसूचित जाती प्रवर्गातील शेतकरी पशुपालकांना वैरणीसाठी शेवगा लागवड करण्यासाठी हेक्टरी ३० हजार रुपये अनुदान उपलब्ध करून देण्यात येणार असल्याने शेतकऱ्यांनी या योजनेचा लाभ घेण्याचे आवाहन जिल्हा पशुसंवर्धन उपायुक्त डॉ. बी आर नरवाडे यांनी केले आहे.

वैरण शेवगा लागवड योजनेतंर्गत जिल्ह्यास १५ हेक्टर क्षेत्राकरिता ०४ लाख ५० हजारांचे अनुदान वितरित करण्यात आले आहे. यात प्रतिहेक्‍टरी ७.५ किलो शेवगा बियाण्याची किंमत ६ हजार ७५० व उर्वरित २३ हजार २५० अनुदान लाभार्थ्यांना दोन टप्प्यामध्ये वितरित करण्यात येईल. यात पशुपालकांना बियाण्याचा थेट पुरवठा करण्यात येणार असून, उर्वरित अनुदानातून जमिनीची मशागत व लागवड खतांची खरेदी व इतर आनुषंगिक खर्चासाठी देण्यात येईल. योजनेचा लाभ घेण्यासाठी शेतकरी पशुपालकांनी जिल्ह्याच्या पशुसंवर्धन उपायुक्त कार्यालय, जिल्हा पशुसंवर्धन अधिकारी जिल्हा परिषद, पशुधन विकास अधिकारी (विस्तार) पंचायत समिती किंवा नजीकच्या पशुवैद्यकीय दवाखान्यात संपर्क साधावा, असे आवाहन डॉ. नरवाडे यांनी केले.