राज्यात सर्वदूर उद्यापासून 4 दिवस पावसाचा अंदाज

नाशिक : तापमानातील वाढीमुळे ढगांच्या निर्मितीचे प्रमाण वाढल्याने बुधवारपासून (ता. २२) शनिवारी (ता. २५) रात्रीपर्यंत मॉन्सूनचा (monsoon ) पाऊस राज्यभर मेहेरनजर करण्याचा अंदाज हवामानशास्त्र अभ्यासकांचा आहे. तसेच २ ते ९ जुलैला होणाऱ्या दुसऱ्या टप्प्यातील पावसामुळे राज्यातील खरीपाच्या (Kharif) पेरण्यांना वेग येण्याची शक्यता वर्तविण्यात येत आहे. (4 days rain forecast for all parts of state from tomorrow nashik news )

मॉन्सूनचे आगमन कधी होणार? याकडे शेतकऱ्यांसह टंचाईग्रस्त भागातील जनता डोळे लावून बसली आहे. अशा एका परिस्थितीत चांगल्या पावसाचा अंदाज अभ्यासकांनी वर्तवला असल्याने दिलासा मिळणार आहे. २५ जुलैला रात्रीनंतर पाऊस १ जुलैपर्यंत उघडीप घेण्याची शक्यता आहे. त्यामुळे स्वाभाविकपणे पेरणीलायक पाऊस होईपर्यंत शेतकऱ्यांना पेरण्यांसाठी घाई करणे परवडणारे नाही. याच पार्श्‍वभूमीवर कृषी विभागातर्फे १० जुलैनंतर खरीपाच्या पेरण्यांना वेग येण्याच्या कृषी विभागातर्फे वर्तविण्यात आलेल्या शक्यतेला महत्त्व प्राप्त झाले आहे. हवामानशास्त्र अभ्यासकांच्या म्हणण्यानुसार ९ ते २४ जुलैला पावसाच्या उघडिपीची शक्यता आहे. मात्र २५ जुलैपासून ऑगस्टपर्यंत राज्यात चांगला पाऊस होण्याचा अंदाज अभ्यासकांनी वर्तवला आहे.