नाशिक पुन्हा हादरलं! अल्पवयीन मुलासह दोघांचा चिमुरडीवर बलात्कार

नाशिक : शहरात खुनाच्या गुन्ह्यात शिक्षा भोगत असलेल्या व सध्या पॅरोल वर बाहेर आलेल्या गुन्हेगाराने सिडकोतील ब्युटी पार्लर मध्ये घुसून चाकूचा धाक दाखवत महिलेवर बलात्कार केल्याची धक्कादायक प्रकार घडला असतानाच सिन्नर तालुक्यात एका गावातील चिमुरडीवर दोन जणांनी बलात्कार केल्याची घटना समोर आल्याने परिसरात खळबळ उडाली आहे.

पोलिसांनी दिलेल्या माहितीनुसार, ऑगस्ट २०२१ च्या पहिल्या आठवड्यापासून ते २५ सप्टेंबर २०२१ पर्यंत फिर्यादी व त्यांच्या पत्नी घरी नसताना आरोपी गणेश निवृत्ती कुंदे (वय ४२) रा. औंढेवाडी ता. सिन्नर याने फिर्यादी यांच्या प्राथमिक शाळेत शिकणाऱ्या अल्पवयीन मुलीवर तिच्या अज्ञातपणाचा फायदा घेत राहत्या घरी व शेतात दोन-तीन वेळा बलात्कार केला. तसेच याबाबत कुणाला सांगितल्यास घरच्यांना मारून टाकण्याची धमकी दिली. यानंतर औंढेवाडी येथीलएका अल्पवयीन आरोपीने देखील चिमुरडीच्या अज्ञानपणाचा फायदा घतिच्यावर बळजबरीने अत्याचार केला. या प्रकरणी ४२ वर्षीय आरोपीवर गुन्हा दाखल करण्यात आला असून, अल्पवयीन मुलास अटक केली आहे.

या घटनेनंतर मुलीने सर्व हकीकत आपल्या आई-वडिलांना सांगितल्यानंतर वडिलांनी पोलिस ठाण्यात धाव घेत दोघांविरुद्ध फिर्याद दाखल केली. याप्रकरणी पोलिसांनी अल्पवयीन मुलास ताब्यात घेतले असून त्यास बालन्यायालयात हजर करण्याची कार्यवाही सुरू आहे. तर दुसऱ्या आरोपीचा शोध सुरू आहे. याप्रकरणी सहाय्यक पोलीस निरीक्षक विजय माळी हे तपास करत आहेत.