नाशिक : पंचवटीत 5 दुचाकी जळून खाक

म्हसरूळ (नाशिक) : पंचवटीतील गुरुद्वारासमोर असलेल्या एका अपार्टमेंटच्या पार्किंगमध्ये उभ्या असलेल्या दुचाकींना आग लागून पाच दुचाकी जळून खाक झाल्याची घटना बुधवारी (ता. २२) रात्री साडेअकरा वाजता घडली. सुदैवाने आगीत कोणत्याही प्रकारची जीवितहानी झाली नाही.

बुधवारी रात्री गुरुद्वारासमोर असलेल्या सीमा अपार्टमेंटमधील रहिवाशांनी पार्किंगमध्ये नेहमीप्रमाणे दुचाकी उभ्या केलेल्या होत्या. रात्री साडेअकरा वाजता आवारात काहीतरी जळाल्याचा वास येऊ लागल्याने आणि धूर झाल्याने सदस्यांनी तत्काळ टेरेसवर धाव घेतली असता, दुचाकी पेटलेल्या दिसल्या. नागरिकांनी तत्काळ पाणी मारून आग विझविण्याचा प्रयत्न केला. इमारतीच्या वाहनतळात मोठा भडका उडाल्याने त्यांनी सुरवातीला सदनिकेच्या राहणाऱ्या नागरिकांना बाहेर काढले. आग लागल्याचे दिसताच शेजारी रहिवाशांनी आग विझविण्याचा प्रयत्न केला.

सदर माहिती पंचवटी अग्निशमन दलास मिळताच त्यांनी तत्काळ धाव घेत आग आटोक्यात आणली. या घटनेत संतोष घुमरे, जोगासिंग थियारा, सिंधू धुमाळ, शशिकांत जगताप, कुणाल खैरनार यांच्या पाचही दुचाकी पूर्णपणे जळून खाक झाल्याने दुचाकी धारकांचे मोठे नुकसान झाले आहे. घटनास्थळी पोलिस दाखल झाले होते. त्यांनी याबाबत नोंद केली आहे. तसेच, ही आग शॉर्टसर्किटमुळे लागल्याचा प्राथमिक अंदाज व्यक्त केला जात आहे.