कोबिंग ऑपरेशनमध्ये 85 टवाळखोरांवर कारवाई

नाशिक : शहरभर पोलिसांनी कोम्बिंग ऑपरेशन (combing operation) मोहीम सुरू केली आहे. या मोहिमेत ८५ टवाळखोरांवर कारवाई केली असून, यात परिमंडळ एकमध्ये २८, तर परिमंडळ दोनमध्ये ५७ टवाळखोरांवर कारवाईचा बडगा उगारण्यात आला आहे. (Action on 85 robbers in combing operation Nashik news)

परिमंडळ एकचे उपायुक्त अमोल तांबे व परिमंडळ दोनचे उपायुक्त विजय खरात यांच्या मार्गदर्शनाखाली कोम्बिंग ऑपरेशन मोहीम सुरू आहे. शुक्रवारी (ता. १७) मध्यरात्री केलेल्या कोम्बिंग ऑपरेशनमध्ये अवैध धंदे, रेकॉर्डवरील गुन्हेगारांची तपासणी, उशिरापर्यंत सुरू आस्थापना, तडीपार गुन्हेगारांचा शोध घेण्यासाठी पथके नेमून कारवाई केली गेली. यात सर्वाधिक ८५ टवाळखोरांविरोधात कारवाई केली. सातपूर पोलिस ठाण्याच्या हद्दीतील ३४ टवाळखोरांचा समावेश आहे. त्याचप्रमाणे, परिमंडळ एकमध्ये १२ आस्थापना या निर्धारित वेळेनंतरही सुरू राहिल्याने त्यांच्यावरही कारवाई केली. यामध्ये सरकारवाडा व मुंबई नाका पोलिस ठाण्याच्या हद्दीतील प्रत्येकी एक- एक तर, गंगापूर पोलिस ठाण्याच्या हद्दीतील १० आस्थापनांचा समावेश आहे.