Ration Scam Crime : शासकीय धान्याचा काळाबाजार; रेशन दुकानदाराविरुद्ध गुन्हा दाखल

Ration Scam Crime : जुन्या आग्रा रोडवरील कालिका मंदिरा पाठीमागे असलेल्या सहवासनगर येथील शासकीय स्वस्त धान्य दुकानात साठ्यापेक्षा जादा धान्य साठा आढळून आला असून, काळ्या बाजारात धान्याची अफरातफर केल्याप्रकरणी मुंबई नाका पोलिसात गुन्हा दाखल करण्यात आला आहे. (Black market of government ration case registered against ration shopkeeper at sahavasnagar nashik news)

अविनाश नारायण माळी (५३, रा. जनरल वैद्य नगर, नाशिक) असे गुन्हा दाखल करण्यात आलेल्या स्वस्त धान्य दुकानदाराचे नाव आहे. धान्य वितरण विभागाचे सिडको विभागाचे पुरवठा निरीक्षक राहुल सिताराम डोळस यांच्या फिर्यादीनुसार, संशयित माळी यांच्या नावे सहवासनगरमधील जीवनरक्षा सोसायटीतील गाळा क्रमांक तीनमध्ये शासकीय स्वस्त धान्य दुकान आहे.

पुरवठा निरीक्षक डोळस हे गुरुवारी (ता. ८) दुपारी साडेबाराच्या सुमारास सहवास नगरमधील शासकीय स्वस्त धान्य दुकान क्रमांक १२४ येथे गेले होते. त्या वेळी सदर दुकानामध्ये त्यांना साठ्यापेक्षा जादा धान्य साठा आढळून आला.

डोळस यांनी तपासणी केली असता, या दुकानातून शासकीय स्वस्त धान्याची अफरातफर व काळाबाजार केला जात असल्याचे त्यांच्या निदर्शनास आले. त्यानुसार त्यांनी मुंबई नाका पोलिसात माळी यांच्याविरुद्ध जीवनावश्यक वस्तु अधिनियम कलमान्वये गुन्हा दाखल केला आहे. सदरील गुन्ह्याचा तपास सहायक पोलीस निरीक्षक मन्सुरी हे करीत आहेत.