बाहेरगावी जाताय, काळजी घ्या; परगावी गेलेल्यांच्या घरी घरफोडी

नाशिक : बाहेरगावी गेलेल्यांच्या घरी शहरात तीन ठिकाणी घरफोड्या होऊन चार लाखांहून अधिक ऐवज चोरट्यांनी लांबविला. बाहेरगावी गेलेल्यांची घर लक्ष्य करून घरफोड्यांचे प्रकार वाढले आहे. आपला शेजारी हाच खरा पहारेकरी, या न्यायाने बाहेरगावी जाणाऱ्यांनी किमान शेजाऱ्यांना तरी सांगून जाण्याची गरज आहे.

सिडको कामटवाडे शिवारात शंभुराजे नगरला घरफोडी करीत चोरट्यांनी सुमारे तीन लाखांचा ऐवज लांबविला. सुरेश विश्वनाथ होळकर ( ६१, रा. शंभुराजेनगर, कामटवाडे) यांच्या तक्रारीवरून अंबड पोलिस ठाण्यात घरफोडीचा गुन्हा दाखल झाला आहे. होळकर यांच्या बंद घरातून चोरट्यांनी १५ ग्रॅमच्या सोन्याच्या अंगठ्या, ५० ग्रॅमची सोन्याची पोत, १० ग्रॅमचे सोन्याचे नेकलेस, २० ग्रॅमचा सोन्याचा हार, १५ ग्रॅमचे सोन्याचे वेल, ५ ग्रॅमचे सोन्याचे मंगळसूत्र, ६ ग्रॅमचे सोन्याची नथीसह इतरही सोन्या चांदीचा सुमारे ३ लाख दोन हजाराचा ऐवज लांबविला.

दुसरा प्रकार गंगापूर शिवारात उघडकीस आला. बाहेरगावी गेलेल्या कुटुंबाच्या घरात लाखोंचा ऐवज चोरट्यांनी लांबविला. गणेश बाळासाहेब गवळी (३१, रा. शिवशक्ती चौक, शिवाजीनगर) यांच्या तक्रारीवरून गंगापूर पोलिस ठाण्यात गुन्हा दाखल झाला आहे. गवळी व त्यांच्या मागील गल्लीत राहणारे अशोक वाघ हे दोन्ही कुटुंब बाहेरगावी गेले असता, चोरट्यांनी दोन्ही घरांतून सोन्या-चांदीचे दागिने, असा लाखांहून अधिकचा ऐवज चोरट्यांनी लांबविला. सातपूर पोलिस ठाण्यात याप्रकरणी घरफोडीचा गुन्हा दाखल झाला आहे.