Nashik Crime : तिग्रानिया रोड परिसरातून कार चोरी

जुने नाशिक : तिग्रानिया रोडवरून कार (एमएच- १५- जीएल- ९१४१) चोरी झाल्याचा प्रकार बुधवार (ता. २७) मध्यरात्री घडला. कारमालक अरुण डोंगरे यांच्या तक्रारीवरून भद्रकाली पोलिस ठाण्यात अज्ञात तीन संशयितांविरुद्ध गुन्हा दाखल करण्यात आला. (Car theft from Tigrania Road area nashik latest crime news)

श्री. डोंगरे यांनी नेहमीप्रमाणे बुधवारी सायंकाळी त्यांची कार राहत असलेल्या बिल्डिंगच्या समोर पार्क केली. गुरुवारी (ता.२८) सकाळी सहाच्या सुमारास त्यांना कार पार्किंगच्या ठिकाणी आढळून आली नाही. परिसरात शोध घेतला तपास लागला नाही.

त्या ठिकाणी असलेल्या भंगार व्यवसायाच्या दुकानातील सीसीटीव्ही फुटेज तपासणी केली. त्यात कारमधून आलेले तीन संशयित श्री. डोंगरे यांच्या कार शेजारी उभे राहून दरवाजा उघडण्याचा प्रयत्न करत असल्याचे आढळले. त्यानंतर रात्री पावणेदोनच्या सुमारास त्यांची कार चोरी करून तपोवनच्या दिशेने गेल्याची माहिती त्यांनी दिलेल्या तक्रारीत नमूद केली.

भद्रकाली पोलिसांकडून तपास सुरू आहे. दीड ते दोन महिन्यापूर्वी येथीलच काठे गल्ली परिसरातून मारुती एस्टिम चारचाकी चोरी झाल्याचा गुन्हा दाखल आहे. काही दिवसांपासून भद्रकाली पोलिस स्टेशन हद्दीत दुचाकी आणि कार चोरी जाण्याचे प्रकार वाढले आहे. अशा घटनांना पोलिसांनी आळा घालण्याचा प्रयत्न करावा, अशी मागणी नागरिकांकडून होत आहे.