भाजपला पुन्हा घरचा आहेर; सभापती स्वाती भामरेंचा उपोषणाचा इशारा

नाशिक : सत्ताधारी भाजप आमदार प्रा. देवयानी फरांदे यांनी डेंगीवरून आरोग्य विभागाला टाळे लावण्याचा दिलेला इशारा, मुकेश शहाणे यांनी माहिती मिळत नसल्याने विद्युत विभागाला टाळे ठोकल्यानंतर सत्ता असूनही सत्ताधारी नगरसेवकांना आंदोलन करावे लागत असल्याने इभ्रत गेलेल्या भाजपला पुन्हा एकदा महिला व बालकल्याण समिती सभापती स्वाती भामरे यांनी कामे होत नसल्याने उपोषणाचा इशारा देत घरचा आहेर दिला.

महापालिकेत सत्तेच्या माध्यमातून मोठी कामे होत असल्याचे बोलले जाते, परंतु भाजपच्या नगरसेवकांना मात्र उलटा अनुभव येत आहे. डेंगी उपचारातून बरे झालेल्या आमदार प्रा. फरांदे यांनी शहरात मोठ्या प्रमाणात डेंगी व चिकूनगुनियाची साथ असल्याने प्रशासनाकडून कुठलीच उपाययोजना होत नसल्याने आरोग्य विभागाला टाळे ठोकण्याचा इशारा तीन दिवसांपूर्वी दिला होता. त्यानंतर दुसऱ्या दिवशी नगरसेवक मुकेश शहाणे यांनी विद्युत विभागाकडून माहिती मिळत नसल्याने या विभागाला टाळे ठोकले होते.

आता त्यात महिला व बालकल्याण समिती सभापती स्वाती भामरे यांची भर पडली आहे. सोमवारी (ता.२०) झालेल्या महासभेत त्यांनी महिला व बालकल्याण समितीचा कार्यकाळ संपत आला असताना अंगणवाडी सेविकांना मानधनवाढ, बचतगट पोषण आहार ठेक्याचा प्रलंबित विषय, महिला रोजगार व प्रशिक्षण निविदेचा घोळ अद्यापही मिटला नसल्याचा आरोप करत कामे होत नसतील तर पुढल्या महासभेत उपोषणाचा इशारा दिला. प्रभारी महापौर गणेश गिते यांनी दखल घेत समितीचे सर्व विषय तत्काळ मार्गी लावण्याच्या सूचना दिल्या. असे असलेतरी हा प्रकारातून सत्ताधारी नगरसेवकांचे कामे होत नसल्याचे पुन्हा एकदा स्पष्ट झाले आहे.